Դեսպան Մկրտչյանը Լատվիայի պատգամավորներին է ներկայացրել ԼՂ խնդրի կարգավորման գործընթացի վերջին զարգացումները
2 րոպեի ընթերցում
ԵՐԵՎԱՆ, 29 ՀՈՒՆՎԱՐԻ, ԱՐՄԵՆՊՐԵՍ: Աշխատանքային այցով Լատվիայում գտնվող դեսպան Տիգրան Մկրտչյանը (նստավայրը՝ Վիլնյուս) հունվարի 24-25-ը հանդիպումներ ունեցավ Լատվիայի Սաեյմայի (խորհրդարան) խմբակցությունների ղեկավարների և ներկայացուցիչների հետ, մասնավորապես՝ «Կանաչների և գյուղացիների միություն» խմբակցության ղեկավար Ավգուստս Բրիգմանիսի, «Համաձայնություն» խմբակցության ղեկավար Յանիս Ուրբանովիչի, «Լատվիական տարածաշրջանային միություն» խմբակցության ղեկավար Նելյա Կլեյնբերգայի, «Միություն» խմբակցության ղեկավար Հոսամս Աբու Մերիի, նույն խմբակցության ղեկավարի տեղակալ Ինթս Դայդերիսի, «Ազգային միություն, ամենը Լատվիայի համար, հայրենի հողի և ազատության համար» (Լատվիա ազգային անկախության շարժում) խմբակցության պատգամավոր Էդվինս Շնիորեի հետ։ Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:
Հանդիպումների ընթացքում դեսպան Մկրտչյանն անդրադարձավ ՀՀ-ԵՄ միջև ստորագրված Համապարփակ և ընդլայնված գործընկերության համաձայնագրին՝ կոչ անելով մոտ ապագայում վավերացնել այն Լատվիայի խորհրդարանի կողմից:
Դեսպան Մկրտչյանը Լատվիայի օրենսդիր մարմնի պատգամավորների հետ հանդիպումների ընթացքում վերջիններիս ներկայացրեց ՀՀ արտաքին քաղաքականության առաջնայնությունները, քննարկվեցին երկու երկրների միջև խորհրդարանական դիվանագիտությունն առաջ մղելուն ուղղված քայլերը, անդրադարձ կատարվեց երկկողմ և բազմակողմ ձևաչափերում համագործակցությանը։
Հանդիպումների ընթացքում դեսպան Մկրտչյանը զրուցակիցներին ներկայացրեց ԼՂ հակամարտության կարգավորման գործընթացի վերջին զարգացումները: