Կառավարության ծրագրերն իրականացնելու պարագայում հաջորդ տարի մեկ շնչին բաժին ընկնող ՀՆԱ-ի աճ կլինի. նախարար

ԵՐԵՎԱՆ, 16 ՆՈՅԵՄԲԵՐԻ, ԱՐՄԵՆՊՐԵՍ: Եթե կառավարությանը հաջողվի իրականացնել նախատեսված ծրագրերը, երկրում մեկ շնչին բաժին ընկնող ՀՆԱ-ի աճ կարձանագրվի: Ազգային ժողովում լրագրողների հետ զրույցում այս մասին ասաց ՀՀ ֆինանսների նախարար Վարդան Արամյանը: «Եթե կարողանանք իրականացնել մեր ծրագրերը, ապա 2018թ. մեկ շնչին բաժին ընկնող ՀՆԱ-ն, որ այսօր կազմում է շուրջ 3 հազար 600 դոլար, կավելանա շուրջ 300 դոլարով»,- «Արմենպրես»-ի հաղորդմամբ՝ նշեց Արամյանը:

Դրան գումարած՝ նախարարն արձանագրում է, որ Հայաստանում արդեն իսկ սպառման աճ է նկատվում, ինչը խոսում է այն մասին, որ կառավարությունը գնում է ճիշտ ճանապարհով: «Այս տարվա առաջին եռամսյակում տնային տնտեսությունների սպառումն աճել է շուրջ 6 տոկոսով, իսկ երկրորդ եռամսյակում՝ շուրջ 11 տոկոսով: Սա նշանակում է, որ մարդիկ սկսել են ավելի շատ սպառել: Տնային տնտեսությունը սկսում է սպառել ավելի շատ այն պայմաններում, երբ ունի եկամուտների աճ կամ ունի դրական սպասումներ ապագայի նկատմամբ: Երբ մարդու մոտ այս երկուսը բացակայում են, ինքը գնում է սպառման կրճատման, ինչը մեզ մոտ եղել է 2015-2016թթ»,- մանրամասնեց նախարարը: