4 րոպեի ընթերցում
ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Միացյալ Թագավորության կառավարությունը նախատեսում է իրականացնել ՀՀ Ազգային ժողովի կարողությունների զարգացմանն ուղղված ծրագիր: Այդ նպատակով այսօր` հունիսի 23-ին, ՀՀ ԱԺ նախագահ Արա Բաբլոյանը եւ Հայաստանի Հանրապետությունում Մեծ Բրիտանիայի եւ Հյուսիսային Իռլանդիայի Միացյալ Թագավորության արտակարգ եւ լիազոր դեսպան Ջուդիթ Ֆարնուորթը կստորագրեն նամակ-համաձայնագիր: Ծրագրի անմիջական իրականացնողը ՀՀ Ազգային ժողովում կլինի Մարդկային զարգացման միջազգային կենտրոնը:
Այսօր կհաստատվի նախնական և միջին մասնագիտական կրթական ծրագրեր իրականացնող հաստատությունների 2017/2018 ուսումնական տարվա անվճար ուսուցմամբ ընդունելության տեղերը: Հարցը նրերառված է այսօր կայանալիք ՀՀ կառավարության նիստի օրակարգում:
Եվրասիա միջազգային համալսարանում կանցկացվի երիտասարդ գիտնականների ամենամյա միջազգային 2-րդ համաժողովը: Երկօրյա համաժողովի ընթացքում աշխարհի տարբեր անկյուններից ժամանած բազմաթիվ երիտասարդ գիտնականներ իրենց կատարած հետազոտությունները կներկայացնեն Միացյալ Նահանգների, Միացյալ Թագավորության և Հայաստանի անվտագության հարցերում մասնագիտացած փորձառու գիտնականներին և վերլուծաբաններին՝ ստանալու նրանց մասնագիտական գնահատականը:
Մեկ այլ գիտաժողովի մասին: ԵՊՀ-ում կանցկացվի «Կիսահաղորդչային միկրո և նանոէլեկտրոնիկա» խորագրով միջազգային 11-րդ երկօրյա գիտաժողովը: Միջազգային գիտաժողովին կմասնակցեն հայ և արտերկրից ժամանած շուրջ 60 գիտնական` Իտալիա, Գերմանիա, Ֆրանսիա, Ռուսաստան: Կմասնակցեն ԵՊՀ-ի, ՀՀ ԳԱԱ-ի և համակազմակերպիչ ընկերությունների ղեկավարները, ինչպես նաև ՀՀ ԿԳՆ գիտության պետական կոմիտեի ներկայացուցիչները:
Ազգային ժողովը հավանություն է տվել կառավարության գործունեության ծրագրին: Կառավարության գործունեության ծրագրին հավանություն տալու մասին հարցին կողմ է քվեարկել 64, դեմ՝ 31 պատգամավոր: Դեմ են քվեարկել Ազգային ժողովի «Ծառուկյան» և «Ելք» խմբակցությունները: Այսօր հասարակական, քաղաքական մի շարք գործիչներ կներկայացնեն իրենց դիտարկումները կառավարության ծրագրի վերաբերյալ:
Ազատության հրապարակում կկայանա Մեծ Բրիտանիայի և Հյուսիսային Իռլանդիայի Միացյալ Թագավորության ՊՆ ռազմական նվագախմբի բացօթյա համերգը: Հունիսի 21-ին նվագախումբը վարպետության դասընթացներ է անցկացրել Երևանի Կոմիտասի անվան պետական կոնսերվատորիայում:
Կարեն Դեմիրճյանի անվան մարզահամերգային համալիրի բեմում «AMEN Project» ընկերությունը ներկայացնում է «Ամեն» երաժշտական դրամատիկ շոու-ներկայացման պրեմիերան։ «Ամեն» շոու-ներկայացումը նվիրված է հայ ժողովրդի պատմությանը, նրա մնայուն արժեքներին և քաղաքակրթության պատմության մեջ իր բացառիկ դերին։ «Ամեն» շոուն էպիկական դրամա է հայ ժողովրդի պատմական ճամփորդության մասին՝ նրա ծագման ու հավատքի, մշակութային կողմնորոշիչների և արժեքների մասին:
«Հրազդան» մարզադաշտի հարակից տարածքում կներկայացվի վերջերս ներկրված էլեկտրական, էկոլոգիական և տնտեսապես շահավետ նոր տրանսպորտային միջոց: Ներկա լրագրողներին հնարավորություն կտրվի անձամբ վարել մեքենան ու ծանոթանալ Nissan Leaf էկոմոբիլի առանձնահատկություններին:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: