ԱՐՏԱՇԱՏ, 3 ՄԱՅԻՍԻ, ԱՐՄԵՆՊՐԵՍ: Արարատի մարզի Արալեզ, Տափերական, Նոր Կյանք դպրոցների եզդի աշակերտներն ապրիլի 3-ին Նոր Կայնքի դպրոցում նշեցին Էզդիկին` այբբենարանի տոնը:
Դպրոցի փոխտնօրեն Նունե Մարտիրոսյանը, ողջունելով հյուրերին եւ շնորհավորելով նրանց Էզդիկի տոնի կապակցությամբ, նշեց, որ եզդի ազգային փոքրամասնությունը մարզի Արալեզ, Տափերական, Նոր Կյանք համայնքների դպրոցներում սովորում է իր մայրենի լեզուն: Նրանք այսօր նշում են իրենց գրաճանաչ դառնալը եւ ցուցադրում ամբողջ տարվա ընթացքում Հաջի Բաքոյանի օգնությամբ սովորած 40 տառերը, եւ տոնում են իրենց գրաճանաչությունը: Վերոհիշյալ համայնքների 17 եզդի աշակերտներին իրենց մայրենի լեզուն դասավանդում է նույն ուսուցչուհին:
«Արմենպրես»-ի փոխանցմամբ՝ աշակերտները բեմ բարձրացան իրենց տարազներով՝ կարմիր վերնազգեստով՝ կրծքներին արեւ: Աշակերտները պատմեցին իրենց հարազատ կորուսյալ հայրենիքի մասին, ներկայացրին այժմ Իրաքի Շանգալ քաղաքում եզդիների կոտորածի, ինչպես նաեւ անդրադարձ կատարեցին 1915 թվականի Եղեռնին: Նրանք նշեցին, որ հայ եւ եզդի ժողովուրդները նույն ճակատագրին են արժանացել եւ փախչելով ու ներագաղթելով Հայաստան` դարձյալ ապրում են միասին՝ շենացնելով հայրենի երկիրը:
Լուսապաստառի ներկայացրել էին արցախյան պատերազմը նկարագրող պատկերներ` Արմենակ Ուրֆանյանին, Քյարամ Սլոյանին, ապրիլյան քառօրյա պատերազմի հայ եւ եզդի նահատակներին: Բայց երեխաները վհատված չեն: Նրանք նշում են, որ ցեղասպանության խորհրդանիշը լոտոս ծաղիկն է, որը որքան էլ չորանում է, նորից ծաղկում է: Նրանք մեկ անգամ եւս ընդգծեցին, որ իրենց հայրենիքը Հայաստանն է, որտեղ իրենց լեզվով գիր ու գրականություն կա, հեռարձակվում են ռադիոհաղորդումներ:
Էզդիկի տոնն աշակերտները նշանավորեցին եզդիերեն բանաստեղծություններ եւ քառասուն տառերով սկսվող աքրոստիկոսներ արտասանելով, դահլիճին հանելուկներ առաջարկելով: Եզդիների ազգային միության նախագահ Ազիզ Թամոյանը, շնորհավորելով երեխաներին, ուսուցչուհի Հաջի Բաքոյանին ասաց, որ աշխարհում չկա Հայաստանի նման երկիր, որտեղ եզդի ազգի մշակույթը ծաղկի, եզդի ազգն իրեն զգա այնպես, ինչպես Հայաստանում: Նա շնորհակալություն հայտնեց ՀՀ կառավարությանը, դպրոցի տնօրեն Կարինե Հարությունյանին հրաշալի միջոցառման համար: Նույն կարծիքը հայտնեց միջոցառմանը ներկա լրագրող Հասան Թամոյանը: Այնուհետեւ, Կրթության ազգային ինստիտուտի փոխտնօրեն Անահիտ Բախշյանը երեք դպրոցների տնօրեններին հանձնեց պատվոգրեր:
Ուուսուցչուհի Հաջի Բաքոյանն իր երախտագիտությունը հայտնեց Նոր Կյանքի ուսուցչական կոլեկտիվին, տնօրենին, փոխտնօրենին իրեն աջակցելու, նեցուկ լինելու համար: Գյուղապետ Գարիկ Սարգսյանն էլ նշեց, որ եզդի համայնքը միշտ իր աշխատանքով նպաստել եւ շարունակում է նպաստել համայնքի առաջընթացին:
Լիլիթ Մաճկալյան