3 րոպեի ընթերցում
ԵՐԵՎԱՆ, 3 ԱՊՐԻԼԻ, ԱՐՄԵՆՊՐԵՍ: Շիրակացու ճեմարանում ապրիլի 1-ին մեկնարկեց «Շիրակացու օրեր» փառատոնը, որը ազդարարվում է տասներորդ դասարանցիների` անհատական նախագծերի ներկայացմամբ: Փառատոնի բացման արարողության ժամանակ հավաստագրեր են հանձնվել Դիպլոմային ծրագրով սովորող` կրթաթոշակի արժանացած սաներին: Մեկ տարի շարունակ տասներորդ դասարանի սաները ընտրել, ուսումնասիրել, հետազոտել են իրենց համար կարևոր մեկ թեմա, որն առավել հոգեհարազատ է իրենց, բավարարում է սեփական հետաքրքրությունները և հնարավորություն է տալիս նորարար լինել այդ թեմայի շրջանակում: Այս մասին «Արմենպրես»-ին տեղեկացրին «Յուքոմ» ընկերության PR և հաղորդակցության ծրագրերի բաժնից:
Անհատական նախագիծը MYP ծրագիրն ավարտող սաների վերջնական հետազոտական աշխատանքն է և միաժամանակ հիմքն այն մյուս բոլոր աշխատանքների, որոնք նրանք դեռ պետք է իրականացնեն հետագայում` թե ճեմարանում, թե ԲՈՒՀ-ում: Անհատական նախագծերի ներկայացումը նշանավորվեց կարևոր նորությամբ. Ճեմարանը սահմանել է ճեմարանական կրթաթոշակ Դիպլոմային ծրագրում սովորողների համար, որից ամենամեծի հովանավորությունը ստանձնել է Ucom ընկերությունը:
100% կրթաթոշակի արժանացած սան` Արմինե Կարապետյանին հանձնելով այդ մասին վկայող հավաստագիրը, Ucom ընկերության գլխավոր տնօրեն Հայկ Եսայանն ընգծեց. «Քանի որ Ucom ընկերությունն իր կորպորատիվ սոցիալական պատասխանատվության շրջանակներում առանձնանում է հենց կրթական նախագծերում իր ներդրումներով, այսօր մենք չէինք կարող անմասն մնալ այս միջոցառումից: Արմինե Կարապետյանին հանձնելով 100% կրթաթոշակի հավաստագիր մենք ևս մեկ անգամ ուզում ենք ընդգծել, որ անկախ երեխայի ծնողների ու հարազատների ֆինանսական հնարավորությունից ու բնակության վայրից, խելացիությունը, լավ առաջադիմությունը, ուշիմությունը, կրթվելու ցանկությունը, նպատակասլացությունը միշտ հատուցվում է: Սա մեծ աշխարհում հայտնվելու լավ հիմք է ու մեծ աշխարհին՝ ապագայում օգտակար լինելու փայլուն հնարավորություն»:
Տասներորդ դասարանից հետո ճեմարանական սաները կարևոր որոշման առջև են կանգնում. ընտրել հետագա կրթությունը ազգային ծրագրով, թե համարձակվել «անցնել ռուբիկոնն» ու դիմել Դիպլոմային ծրագրով ուսումը շարունակելու:
«Եվ այս կարևոր քայլից առաջ, մենք` Ճեմարանի տնօրինությունը, խրախուսում ենք նրանց լինելու համարձակ և կատարելու վճռորոշ քայլը` առաջնորդվելով ոչ թե գումարային, այլ գիտելիքների և ինքնավստահության վրա հիմնավորված որոշմամբ` կարևոր ողջ հետագա կյանքի համար: Մինչ այժմ Դիպլոմային ծրագրում սովորելու հնարավորություն ունեցել են միայն այն սաները, ովքեր կարողացել են վճարել ուսման համար սահմանված գումարը, այժմ կրթաթոշակների առկայությամբ հնարավոր դարձավ իրականացնել դա նաև նրանց համար, ովքեր վճարունակ չեն, բայց մեծ ներուժ ու ցանկություն ունեն ստանալու միջազգային մակարդակի կրթություն»,- ասաց ավագ դպրոցի տնօրեն Զարուհի Ղալթախչյանը: