4 րոպեի ընթերցում
ԵՐԵՎԱՆ, 23 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Գործադիրը հավանության կարժանացնի «Կամավորական գործունեության և կամավոր աշխատանքի մասին» Հայաստանի Հանրապետության օրենքի հայեցակարգը: Այս հարցը ներառված է այսօր` ապրիլի 23-ին, կայանալիք կառավարության նիստի օրակարգում: Հայեցակարգի նպատակը կամավորական գործունեության օրենսդրական կարգավորման համապատասխան հիմքերի և ուղղությունների մատնանշումն է: Օրակարգային մեկ այլ հացով էլ գործադիրը կքննարկի Հայաստանի միգրացիայի քաղաքականության 2017-2021 թվականների ռազմավարությունը:
Ընթերցասեր հասարակությանը կներկայացվեն ՀՀ սփյուռքի նախարարության հովանավորությամբ և պատվերով հրատարակված մի շարք գրքեր: Ելույթ կունենան ՀՀ սփյուռքի նախարար Հրանուշ Հակոբյանը, ՀՀ ԿԳ նախարարի տեղակալ Մանուկ Մկրտչյանը, Գիտության պետական կոմիտեի նախագահ Սամվել Հարությունյանը և ԵՊՀ ռեկտոր Արամ Սիմոնյանը: Շնորհանդեսին կմասնակցեն անվանի գիտնականներ, քաղաքագետներ, թուրքագետներ, լեզվաբաններ, հասարակական գործիչներ, մտավորականներ:
«Ֆրանկոֆոնիայի տասնհինգ օրերը 2017» միջոցառումների շրջանակում Երևանում կանցկացվի տնտեսական ուղղվածության հանդիպում՝ «Ֆրանկոֆոն ստարտափերը և թվային նորարարությունը» խորագրով: Ելույթ կունենա Հայաստանում Ֆրանսիայի դեսպան Ժան-Ֆրանսուա Շարպանտիեն, ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արման Խաչատրյան:
ՅՈՒՆԵՍԿՕ-ի գլխավոր քարտուղարի պաշտոնում Ադրբեջանն առաջարկել է Ռուսաստանում Ադրբեջանի դեսպան Փոլադ Բյուլբյուլօղլուի թեկնածությունը: Դրա վտանգների, հետևանքների, ինչպես նաև հայկական կողմի անելիքների մասին կխոսեն քանդակագործ Ֆերդինանդ Առաքելյանը, բանասիրական գիտությունների դոկտոր Ազատ Եղիազարյանը:
Առողջապահության ոլորտում 2017թ-ի պետպատվերն ինչպե՞ս է բաշխվել և ինչպիսի՞ վերահսկողություն է իրականացվում։ ՀՀ ԱՆ աշխատակազմի պետական առողջապահական գործակալության պետի ժամանակավոր պաշտոնակատար Ծաղիկ Վարդանյանը կանդրադառնա պետպատվերի ոլորտում առկա հիմնական խնդիրներին ու մտահոգություններին, պետպատվերի համակարգի առողջացմանն ուղղված քայլերին։
2016 թվականի մարտի 23-ին, 65 տարեկան հասակում կյանքից հեռացավ մեծանուն օպերային երգիչ և բեմադրիչ, ՀՀ ժողովրդական արտիստ Գեղամ Գրիգորյանը: Այսօր նրա շիրմի մոտ տեղի կունենա հիշատակի արարողություն: Երեկոյան էլ Ալ.Սպենդիարյանի անվան օպերայի և բալետի ազգային ակադեմիական թատրոնում կկայանա Գեղամ Գրիգորյանի հիշատակին նվիրված համերգային երեկո: Ելույթ կունենան մաեստրո Գրիգորյանի ընկերներն ու աշակերտները:
«Պարարվեստի զարգացման» կրթամշակությային հիմնադրամը ներկայացնում է 2 պրեմիերա՝ «Տեսիլաժամեր» և «Տրիպտիխ» ժամանակակից բալետային ներկայացումները: Դրանք արդեն իսկ հաջողություն են ունեցել արտասահմանում՝ մասնակցելով հանրահայտ «Diana Vishneva Context» միջազգային ժամանակակից պարի փառատոնին և Հարավային Կովկասի ժամանակակից պարի և փորձառական արվեստի միջազգային փառատոնին:
ՀՀ սպորտի և երիտասարդության հարցերի նախարարությունը, ի կատարումն ՀՀ վարչապետի հանձնարարականի, սպորտի մասսայականացման ծրագրի շրջանակում կազմակերպում է «Մանկական աթլետիկան դպրոցներում» մասսայական միջոցառումը: Կմասնակցեն Երևան քաղաքի Դավթաշեն, Աջափնյակ, Մալաթիա-Սեբաստիա, Ավան, Նոր Նորք և Կենտրոն համայնքների հանրակրթական դպրոցների 6-րդ դասարանի աշակերտները:
Այս և այլ թեմաների մասին կարող եք մանրամասն ընթերցելarmenpress.amկայք էջում և լսել լրատվական ռադիոյի եթերում: Հետևեք մեզթվիթերումևֆեյսբուքում: