4 րոպեի ընթերցում
ԵՐԵՎԱՆ, 14 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Հայաստանի նախագահ Սերժ Սարգսյանն այսօր` մարտի 14-ին, երկօրյա պաշտոնական այցով կմեկնի Ռուսաստան: Նախագահը հանդիպումներ կունենա երկրի բարձրագույն ղեկավարության հետ: Կքննարկվեն ռազմավարական գործընկեր երկու պետությունների միջև մի շարք ոլորտներում առանցքային հարցեր:
Նախագահներ Սերժ Սարգսյանը և Վլադիմիր Պուտինը մտքեր կփոխանակեն նաև միջազգային և տարածաշրջանային մի շարք արդիական խնդիրների շուրջ, կքննարկեն ԼՂ հիմնախնդրի կարգավորման գործընթացը: Այցի շրջանակում Սերժ Սարգսյանը կհյուրընկալվի Մոսկվայի միջազգային հարաբերությունների պետական ինստիտուտում, որտեղ հանդիպում կունենա համալսարանի ուսանողության և պրոֆեսորադասախոսական կազմի հետ:
Երևանում կանցկացվի աշխատաժողով` նվիրված «Սևծովյան ավազանի երկրների անդրսահմանային համագործակցության 2014-2020թթ.»-ի ծրագրին: Ներկա կլինեն ՀՀ տնտեսական զարգացման և ներդրումների նախարարի առաջին տեղակալ Գարեգին Մելքոնյանը և Հայաստանում Եվրամիության պատվիրակության ղեկավար, դեսպան Պիոտր Սվիտալսկին:
ՀՀ-ում Ֆրանսիայի դեսպանատանը Ֆրանկոֆոնիայի օրերի մեկնարկի, ինչպես նաև երրորդ տարին անընդմեջ Հայաստանում անցկացվող «Ֆրանսիայի համը» խոհարարական միջոցառման կապակցությամբ լրագրողների հետ կհանդիպի դեսպան Ժան-Ֆրանսուա Շարպանտիեն: Նա կներկայացնի Ֆրանկոֆոնիայի օրերի շրջանակում դեսպանության կողմից կազմակերպվելիք միջոցառումները: Ավելի ուշ Ֆրանսիայի դեսպանությունում տեղի կունենա ընդունելություն, որի ընթացքում «Ֆրանսիայի համը» միջոցառմանը մասնակցող ռեստորանների շեֆ-խոհարարները կներկայացնեն իրենց կողմից առաջարկվող ճաշատեսակները:
Մոսկվայում մարտի 17-ին տեղի կունենա ԱՊՀ տնտեսական խորհրդի նիստը։ Նիստին ընդառաջ կազմակերպվում է Երևան-Մոսկվա-Աստանա-Բիշքեկ-Քիշնև-Մինսկ տեսակամուրջը՝ «Անկախ պետությունների համագործակցության տնտեսական օրակարգը» թեմայով։ Տեսակամուրջի ընթացքում կներկայացվեն տնտեսական և սոցիալական հարցեր:
Կներկայացվեն հանրային գնումների համակարգի 2016-2017թթ-ի մոնիտորինգի արդյունքները: «Թրանսփարենսի Ինթերնեշնլ հակակոռուպցիոն կենտրոն» -ի ծրագրերի ղեկավար Վարուժան Հոկտանյանն անդրադարձ կկատարի նաև ՀՀ «Գնումների մասին» նոր օրենքին, որն ընդունվեց 2016թ. դեկտեմբերի 16-ին և ուժի մեջ կմտնի այս տարվա ապրիլի 25-ից:
Ընթերցասերներին կներկայացվեն Էդիկ և Տաթևիկ Մինասյանների «Հայ կանայք 19-րդ դարավերջի և 20-րդ դարասկզբի հերոսամարտի տարիներին», ինչպես նաև «Հայ հերոսուհի կանայք» գրքերը: Գրքերի շնորհանդեսը տեղի կունենա այսօր ՀՀ սփյուռքի նախարարությունում: Միջոցառմանը կմասնակցեն Սփյուռքի նախարար Հրանուշ Հակոբյանը, Մշակույթի նախարար Արմեն Ամիրյանը, ԵՊՀ ռեկտոր Արամ Սիմոնյանը և այլք:
Այս և այլ թեմաների մասին կարող եք մանրամասն ընթերցելarmenpress.amկայք էջում և լսել լրատվական ռադիոյի եթերում: Հետևեք մեզթվիթերումևֆեյսբուքում: