Հայաստան-ՆԱՏՕ հարաբերությունները հիմնված են գիտակցված ընդհանուր շահերի վրա. Սերժ Սարգսյան

ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը և ՆԱՏՕ-ի գլխավորքարտուղարՅենս Ստոլտենբերգը Բրյուսելում տեղի ունեցած հանդիպման ընթացքում քննարկել են երկկողմ հետաքրքրություն ներկայացնող հարցեր: Հանդիպումից հետո համատեղ ասուլիսում ՀՀ Նախագահը նշեց, որ այս տարի լրանում է հյուսիսատլանտյան դաշինքի հետ Հայաստանի համագործակցության 25-ամյակը:

«Քառորդ դար առաջ՝ 1992 թվականին էր, երբ նորանկախ Հայաստանն անդամակցեց հյուսիսատլանտյան համագործակցության խորհրդին՝ սկիզբ դնելով ՆԱՏՕ-ի հետ գործընկերական հարաբերությունների ձևավորմանը: Ուրախությամբ եմ այսօր փաստում, որ քառորդ դարի ընթացքում մեր փոխգործակցությունն աճել ու շարունակաբար համալրվել է նոր բովանդակությամբ՝ դառնալով Հայաստանի Հանրապետության բազմաշերտ անվտանգության համակարգի բաղադրիչներից մեկը: Հայաստան-ՆԱՏՕ հարաբերությունները հիմնված են գիտակցված ընդհանուր շահերի վրա և ունեն բավականին հարուստ օրակարգ»,- «Արմենպրես»-ի հաղորդմամբ՝ ընդգծեց Սերժ Սարգսյանը՝ ավելացնելով, որ այն ներառում է թե ամենաբարձր մակարդակի քաղաքական երկխոսություն, թե գործնական համագործակցության բազմաթիվ օրինակներ:

ՀՀ Նախագահը նշեց, որ ՆԱՏՕ-ի գլխավոր քարտուղարի հետ երկուստեք կարևորել են քաղաքական երկխոսության ներկայիս մակարդակի պահպանումն ու պարբերական շփումների շարունակականությունը, ինչպես նաև քննարկել են ՆԱՏՕ-ի հետ ՀՀ-ի գործընկերային հարաբերությունների հետագա զարգացմանն ու ընդլայնմանն առնչվող հարցեր:

«Արձանագրեցինք, որ հաջողությամբ իրականացվել են Հայաստան-ՆԱՏՕ անհատական գործընկերության գործողությունների չորս ծրագրեր և ներկայումս հաստատման փուլում է գտնվում 2017-2019 թվականների համար արդեն հինգերորդ ծրագիրը: Հատուկ ընդգծեցինք Հայաստանում ՆԱՏՕ-ի վստահության հիմնադրամի գործունեության մոտալուտ մեկնարկի կարևորությունը»,- ասաց Սերժ Սարգսյանը՝ վերահաստատելով Հայաստանի հանձնառությունը՝ շարունակելու դրական օրակարգ ձևավորել հյուսիսատլանտյան դաշինքի կազմակերպության և դրա անդամ պետությունների հետ՝ միջազգային խաղաղության և անվտանգության հետագա ամրապնդման նպատակով: