3 րոպեի ընթերցում
ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` նոյեմբերի 9-ին, Հայաստանի ավտոապահովագրողների բյուրոյի գործադիր տնօրեն Վահան Ավետիսյանը կներկայացնի ավտոապահովագրության ոլորտում իրականացվող փոփոխությունները: Կներկայացվեն նաև ամփոփ տվյալներ ՀՀ-ում վարորդների կողմից պատահարների ինքնուրույն գրանցման համակարգի արդյունքների վիճակագրության վերաբերյալ:
Մեկնարկում է «Լուսավոր Սահման» բարեգործական նախագիծը, որի նպատակը սահմանամերձ բնակավայրերում բնակիչների համար լուսադիոդային լամպերի տեղադրմամբ կայունության ստեղծումն է: «Սահման» ՀԿ համահիմնադիր և ծրագրերի ղեկավար Անահիտ Նազարյանը, ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը, «Շտիգեն» ընկերության տնօրեն Հայկ Շեկյանը կներկայացնեն նախագծի մանրամասները:
Ընթացիկ տարում ի՞նչ գնային տատանումներ են գրանցվել սպառողական շուկայում, ո՞ր ապրանքներն են թանկացել, որո՞նք էժանացել. ՀՀ ազգային վիճակագրական ծառայության նախագահի խորհրդական Գուրգեն Մարտիրոսյանը կներկայացնի վերջին տվյալները:
ՀՀ ԱԺ պատգամավորներ Կարինե Աճեմյանը եւ Հեղինե Բիշարյանը լրագրողների հետ հանդիպմանը կանդրադառնան հոկտեմբերի 23-27-ը Ժնեւում տեղի ունեցած Միջխորհրդարանական միության 135-րդ վեհաժողովի աշխատանքներին:
Ս.Դ. Հնչակյան կուսակցությունը և Ռամկավար Ազատական կուսակցությունը կազմակերպում է քննարկում «Սիրիահայության առջև ծառացած ներքին և արտաքին մարտահրավերները» խորագրով:
ՀՀ սպորտի և երիտասարդության հարցերի նախարարի տեղակալ Արսեն Քարամյանը կներկայացնի մանրամասներ «100 գաղափար Հայաստանի համար» նորարարական նախագծերի և գիտատեխնիկական մշակումների հանրապետական երիտասարդական մրցույթի վերաբերյալ: Մրցույթի նպատակն է երիտասարդական գյուտարարության, նորարարության խթանումը և զարգացումը:
Հայաստանի ազգային հավաքականի և «Մանչեսթեր Յունայթեդ»-ի կիսապաշտպան Հենրիխ Մխիթարյանը նշանակվում է ՀՀ-ում ՅՈՒՆԻՍԵՖ-ի բարի կամքի դեսպան: Այսօր Երևանում տեղի կունենա ՅՈՒՆԻՍԵՖ-ի բարի կամքի ազգային դեսպանի նշանակման պաշտոնական արարողությանը:
Նոյեմբերի 10-ին Արամ Խաչատրյան համերգասրահում տեղի կունենա Դրեզդենի սիմֆոնիկ նվագախմբի «Աղետ» խորագիրը կրող համերգը: Համերգին ընդառաջ լրագրողների հետ հանդիպմանը կներկայացվեն համերգային ծրագրերի մանրամասները: Նշենք, որ 2015 թվականին Բեռլինում, 2016 թվականին` Դրեզդենում և Բրանդենբուրգում հաջողությամբ իրականացված և լայն արձագանք գտած այս համերգը նվիրված է Հայոց ցեղասպանության զոհերի հիշատակին:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: