4 րոպեի ընթերցում
ԵՐԵՎԱՆ, 7 ՆՈՅԵՄԲԵՐԻ, ԱՐՄԵՆՊՐԵՍ:«Արմենպրես» պետական լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Ինչպիսի՞ սոցիալական պատկեր ունի Հայաստանն ու աղքատության ինչպիսի՞ մակարդակ է գրանցվել վերջին ուսումնասիրությունների համաձայն: Այսօր՝ նոյեմբերի 7-ին, Երևանում ՀՀ ԱՎԾ-յան և Համաշխարհային բանկի փորձագետների մասնակցությամբ կներկայացվի «Հայաստանի սոցիալական պատկերը և աղքատությունը. 2015 թվականի տնային տնտեսությունների կենսապայմանների ամբողջացված հետազոտության հիմնական արդյունքները» զեկույցը:
Երևանում կանցկացվի «Դպրոցների տնօրենների միջազգային համաժողով. 21-րդ դարի մետաքսի ճանապարհ հայեցակարգի շրջանակներում» խորագրով: Բացման խոսքով հանդես կգան ՀՀ ԱԺ փոխխոսնակ Հերմինե Նաղդալյանը, ՀՀ ԿԳ նախարար Լևոն Մկրտչյանը, պատգամավորներ, դիվանագիտական կորպուսի ներկայացուցիչներ և այլք:
Մերձավորարևելյան զարգացումները նոր ընթացք են ստանում: Իրաքում, Սիրիայում մարտերը գնալով թեժանում են, իսկ Թուրքիայում ավելանում է ձերբակալվածների թիվը: Թուրքական իշխանությունների կողմից թիրախավորվում են նաև պատգամավորները: Մերձավոր Արևելքում առկա իրավիճակին, մասնավորապես, Սիրիայում, Իրաքում, Թուրքիայում տեղի ունեցած վերջին զարգացումներին կանդրադառնա «Նորավանք» գիտակրթական հիմնադրամի տնօրեն Գագիկ Հարությունյանը:
ՀՀ Առողջապահության նախարարի տեղակալ Սամվել Մարգարյանը կներկայացնի ՀՀ կառավարության նոր ծրագրի շրջանակում առողջապահական ոլորտում սպասվող բարեփոխումները:
«Ձեռնարկությունների ինկուբատոր» հիմնադրամի (EIF) տնօրեն Բագրատ Ենգիբարյանը կանդրադառնա Հայաստանի տեղեկատվական տեխնոլոգիաների ոլորտի ներուժին, վերջին զարգացումներին ու առաջիկա բարեփոխումներին:
Հայաստանում անցկացվում է առողջապահական իրավունքի առաջին միջազգային համաժողովը՝ «Մարդու իրավունքները և առողջապահությունը» խորագրով: Ոլորտի հարցերին կանդրադառնան ՀՀ Արդարադատության նախարար Արփինե Հովհաննիսյանը, ՀՀ Առողջապահության նախարար Լևոն Ալթունյանը, ՀՀ Աշխատանքի և սոցիալական հարցերի նախարար Արտեմ Ասատրյանը, Եվրոպական միության պատվիրակության ղեկավար, դեսպան Պյոտր Սվիտալսկին և այլք:
Մշակույթի նախարար Արմեն Ամիրյանն այսօր հրավիրում է Գաբրիել Սունդուկյանի անվան ազգային ակադեմիական թատրոն՝ իր և թատրոնի գեղարվեստական ղեկավար Արմեն Էլբակյանի, տնօրեն Ստեփան Դավթյանի հետ շրջայց կատարելու վերանորոգված թատրոնում: Այնտեղ իրականացվել է զգալի աշխատանք, վերազինվել են բեմական մեխանիզմներն ու լուսավորությունը, ձայնային նոր համակարգերը: Վերանորոգման աշխատանքը սկսվել է 2015թ. հոկտեմբերից: Թատրոնի դահլիճը պատրաստ է շահագործման և նորամուտը կտոնի «Պեպո» բեմադրությամբ:
Նոյեմբերի առաջին տասնօրյակում նշվում է Որակի համաշխարհային օրը: Այն ամենամյա միջոցառում է, որն անցկացվում է աշխարհի շատ երկրներում: Նպատակն է ապրանքների և ծառայությունների որակի բարձրացումը, ինչպես նաև որակի խնդիրների հանդեպ պատասխանատուների ուշադրություն հրավիրելը: Օրվան ընդառաջ թեմայի վերաբերյալ իրենց դիտարկումները կներկայացնեն Սննդամթերքի անվտանգության և որակի հսկողության տեսչության պետ Վահե Դանիելյանը, Սպառողների միության նախագահ Արմեն Պողոսյանը և հայրենական ապրանք արտադրող առաջատար ընկերության գլխավոր տեխնոլոգ Կարեն Պողոսյանը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: