3 րոպեի ընթերցում
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: «Արմենպրես» պետական լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Ի՞նչ խնդիրներ կան անձնական տվյալների պաշտպանության ոլորտում, ի՞նչ քայլեր են ձեռնարկվում դրանց լուծման ուղղությամբ: ՀՀ արդարադատության նախարարության Անձնական տվյալների պաշտպանության գործակալության պետ Շուշան Դոյդոյանը, տեղեկատվական անվտանգության փորձագետ Սամվել Մարտիրոսյանը այսօր` հոկտեմբերի 19-ին, կխոսեն վերը նշված հարցերի շուրջ:
Մ.Մաշտոցի անվան հին ձեռագրերի գիտահետազոտական ինստիտուտ- Մատենադարանում տեղի կունենա «Միջուկային հետազոտությունների միացյալ ինստիտուտի օրերը Հայաստանում» խորագրով միջազգային գիտաժողով: Մասնակցում են աշխարհի տարբեր երկրներից Հայաստան ժամանած ճանաչված գիտնականներ: Գիտաժողովի մասնակիցներին կողջունի ՀՀ ԿԳ նախարար Լևոն Մկրտչյանը:
Երևանում քննարկվում են հեղինակային իրավունքին առնչվող խնդիրները: ՀՀ մտավոր սեփականության գործակալության հեղինակային իրավունքի և հարակից իրավունքների բաժնի պետ Քրիստինե Համբարյանը կխոսի համապատասխան ոլորտում օրենսդրական փոփոխությունների անհրաժեշտության մասին:
Աշնանը սրվում են շնչառական հիվանդությունները. Ինչպե՞ս կանխարգելել և բուժել դրանք: ՀՀ ԱՆ գլխավոր թոքաբան, ՀՀ վաստակավոր բժիշկ Անդրանիկ Ոսկանյանը կխոսի թեմայի շուրջ:
Հայաստանի բուսաբանական ինստիտուտում կներկայացվի «Կանաչ Հայաստան» գիրքը, որը պատրաստվել և տպագրվել է «ENPI FLEG» ծրագրի շրջանակում` ֆինանսավորված Եվրոպական Միության և Ավստրիական զարգացման համագործակցության կողմից: Բացման խոսքով հանդես կգան ՀՀ ԳԱԱ Բուսաբանության ինստիտուտի տնօրեն Ժիրայր Վարդանյանը, ՀՀ բնապահպանության փոխնախարար Սիմոն Պապյանը, «Հայանտառ» ՊՈԱԿ-ի տնօրեն Մարտուն Մաթևոսյանը, Բնության համաշխարհային հիմնադրամի հայաստանյան մասնաճյուղի տնօրեն Կարեն Մանվելյանը:
Հայաստանի ազգային պատկերասրահում ՀՀ սփյուռքի նախարարության նախաձեռնությամբ տեղի կունենա գեղանկարիչ, ազգագրագետ Հրազդան Թոքմաջյանի «Գալէմքեարեաններ. Այնթապ, Դամասկոս, Հալէպ» գրքի շնորհանդեսը: Գրքում ներկայացված են Գալէմքեարեանների պղնձագործության նմուշներն ու ավանդույթները: Միջոցառմանը ներկա կլինեն ՀՀ սփյուռքի նախարար Հրանուշ Հակոբյանը, հասարակական գործիչներ, մտավորականներ:
Գրողների միությունում տեղի կունենա Լեւոն Անանյանի անվան մրցանակների հանձնման արարողություն: «Առնո Բաբաջանյան» համերգասրահում էլ կանցկացվի Մետաքսեի ծննդյան 90-ամյակին նվիրված միջոցառում:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: