Սպասվող լրահոս. 07.09.2016

ԵՐԵՎԱՆ, 7 ՍԵՊՏԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:

Սեպտեմբերի 19-22-ը Հայաստանում կանցկացվի «Պատրաստված է Հայաստանում» ապրանքների ամենախոշոր ցուցահանդեսը: Չորս օր շարունակ արտադրության տարբեր ոլորտների հայկական ընկերությունները հնարավորություն կունենան ներկայանալ հայ սպառողներին, կապեր հաստատել շուկայում գործող այլ ընկերությունների, ինչպես նաև օտարերկրյա գործարարների ու ներդրողների հետ: Այս կարևոր միջոցառմանն ընդառաջ այսօր՝ սեպտեմբերի 7-ին, ՀՀ էկոնոմիկայի նախարարությունում Հայաստանի զարգացման հիմնադրամի գործադիր տնօրեն Կարէն Մկրտիչեանը և արտահանման գծով տնօրեն Հայկ Միրզոյան կներկայացնեն սպասվող ցուցահանդեսի և համաժողովի նախապատրաստական ընթացքը։

Հայ փորձագետները շարունակում են վերլուծել Սիրիայի տարածքում Թուրքիայի կողմից ծավալվող ակտիվ գործողությունները: Այս անգամ իր վերլուծությունը կներկայացնի թուրքագետ Անուշ Հովհաննիսյանն՝ անդրադառնալով ինչպես Թուրքիայի քաղաքականությանը Սիրիայում, այնպես էլ Թուրքիա-ԱՄՆ, Թուրքիա-Ռուսաստան և Թուրքիա-Իրան հարաբերություններին:

Ի՞նչ է արվել տարեսկզբին իշխանությունների կողմից հայտարարված կոռուպցիայի դեմ պայքարի շրջանակում, արդյո՞ք փոփոխություններ գրանցվել են: «Թրանսփարենսի ինթերնեյշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը կվերլուծի իրավիճակը:

Կարտոֆիլ արտադրող խոշոր և միջին ֆերմերները կազմակերպում են հանդիպում-քննարկում՝ Հայաստանի կարտոֆիլագործության ոլորտում առկա խնդիրները վերհանելու և լուծումներ գտնելու համար: Լոռու մարզի կարտոֆիլագործների ասոցիացիան տեղեկացնում է, որ իրենց մտահոգությունն են հայտնելու ոլորտում առկա մի շարք խնդիրների վերաբերյալ: Խոսելու են վճռական քայլերի դիմելու անհրաժեշտության մասին:

Բյուրականի աստղադիտարանը 70 տարեկան է: Ի՞նչ ծրագրեր ու միջոցառումներ են սպասվում հոբելյանական տարվա շրջանակում, ի՞նչ նորություններով է հանդես գալու Բյուրականի աստղադիտարանը: Այս և այլ հարցերին կանդրադառնան Բյուրականի աստղադիտարանի տնօրեն Հայկ Հարությունյանը և ավագ գիտաշխատող Արեգ Միքայելյանը:

Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: