Մանկական բեսթսելեր 4/6. Սիլվա Կապուտիկյանը նորից գլխավորում է վարկանիշային աղյուսակը

ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: «Արմենպրես» լրատվական գործակալության «Մանկական բեսթսելեր» հեղինակային նախագիծն ամփոփում է այս տարվա հունիս ամսվա ցուցանիշները:

Հ ունիսին առաջատարը կրկին «Փոքրիկ Արա, ականջ արա» գիրքն է: Սիլվա Կապուտիկյանի մանկական բանաստեղծությունները տասնամյակներ շարունակ եղել են ոչ միայն հայ, այլև օտարազգի ընթերցողի ուղեկիցները, բազմահազար մանուկների հոգում սերմանել բարին, վեհն ու գեղեցիկը:

«Էդիթ Պրինտի» մանկական «Արև, արև, եկ, եկ» բանաստեղծությունների ժողովածուն, որում ընդգրկված են տարբեր սերունդների ներկայացուցիչ հայ մանկագիրների գործերը, երկրորդ հորիզոնականում է:

«Հայ ժողովրդական առակներ» ժողովածուն երրորդն է: Ժողովածուում ընդգրկվել են դասական՝ այլաբանական առակներ, որոնց հերոսները մեծ մասամբ կենդանիներ են, առակատիպ ժողովրդական զրույցներ, հեքիաթատիպ առակներ:

Ռուբեն Մարուխյանի «Չիկարելիի արկածները» չորրորդ տեղում է: Հեղինակը սովորեցնում է, որ չի կարելի սուտ խոսել, շատ ուտել, նախանձել ընկերոջը, բարեկամին, բամբասել, խարդախությամբ ու խաբեբայությամբ զբաղվել, անազնիվ չի կարելի լինել: Չի կարելի նաև թռչուններին ու կենդանիներին պարսատիկով հալածել, ծառ կտրել, ծաղիկներ պոկոտել, աղբյուրի ակունքը աղտոտել... Ինչքա՜ն բան կա մեր կյանքում, որ չի կարելի անել: Գիրքը հրատարակել է «Էդիթ Պրինտ»-ը:

«Սասնա տուն» գիրքը հինգերորդ տեղում է: Հայ ժողովրդական դյուցազնավեպի Մկրտիչ Խերանյանի պատումը մանուկների համար համառոտ վերապատմել են Անժել Քյուրքչյանը և Լիլիթ Տեր-Գրիգորյանը: Այն վերահրատարակել է«Էդիթ Պրինտ»-ը:

Իսկ Ջոան Ռոուլինգի «Հարրի Փոթերը և փիլիսոփայական քարը» այս ամիս վեցերորդ հորիզոնականում է: Համաշխարհային այս բեսթսելերը մշտապես մեծ պահանջարկ ունի տարբեր երկրներում: Հայաստանում՝ ևս:

Ռուսական հայտնի ու սիրված հեքիաթներից մեկը՝ «Ով է ապրում տնակում»-ը յոթերորդ տեղում է:

Ութերորդը Շառլ Պերոյի «Կարմիր գլխարկը» հեքիաթն է: Այն կարծես օրորոցային լինի փոքրիկների համար, հետևաբար քաջ հայտնի է բոլորին: «Կարմիր գլխարկը» ամենահայտնի հեքիաթներից է և սիրված բոլորի կողմից: Գիրքը հրատարակել է «Բուկինիստ»-ը:

Կոռնեյ Չուկովսկու «Ճանճը փոքրիկ, ոսկեփորիկ» հեքիաթը նույնպես ընդգրկվել է վարկանիշային աղյուսակում: Այն զբաղեցնում է իններորդ հորիզոնականը:Գիրքը հրատարակել է դարձյալ «Բուկինիստ»-ը:

«Ագահ Մեդոկը», «Ֆինվարայի կախարդական գավաթը» և «Հավեյն ասպետի պսակադրությունը» տղաներին կսովորեցնեն լինել քաջ, բարի, մեծահոգի և հնարամիտ: Դրանք զետեղված են «Բուկինիստ»-ի «Հեքիաթներ տղաների համար» գրքույկում, որը եզրափակում է վարկանիշային աղյուսակը:

Վարկանիշային աղյուսակի կազմման հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ գիրք» (54-07-06), «Բուկինիստ» (53-74-13) և «Զանգակ» (23-26-49) գրախանութները: Հարցման ընթացքում հաշվի չեն առնվել դասագրքերը:

Տեղ	Գիրք		Հրատ.	Քանակ
1		Սիլվա Կապուտիկյան «Փոքրիկ Արա, ականջ արա»	Էդիթ Պրինտ	67
2		«Արև, արև, եկ, եկ»	Էդիթ Պրինտ	62
3		«Հայ ժողովրդական առակներ»	Էդիթ Պրինտ	26
4		Ռուբեն Մարուխյան «Չիկարելիի արկածները»	Էդիթ Պրինտ	23
5		«Սասնա տուն»	Էդիթ Պրինտ	21
6		Ջոան Ռոուլինգ «Հարրի Փոթերը և փիլիսոփայական քարը»	Զանգակ	17
7		«Ով է ապրում տնակում»	Բուկինիստ	9
8		Շառլ Պերոյի «Կարմիր գլխարկը»	Բուկինիստ	8
9		Կորնեյ Չուկովսկի «Ճանճը փոքրիկ, ոսկեփորիկ»	Բուկինիստ	7
10		«Հեքիաթներ տղաների համար»	Բուկինիստ	7

«Մանկական բեսթսելերը» ներկայացրեց Լուսինե Ղազարյանը