Մանկական բեսթսելեր 4/21. «Ալիսը հրաշքների աշխարհում» գիրքը մանուկների նախընտրածներից է

ԵՐԵՎԱՆ,1 ՆՈՅԵՄԲԵՐԻ, ԱՐՄԵՆՊՐԵՍ:«Արմենպրես»լրատվական գործակալության «Մանկական բեսթսելեր» հեղինակային նախագիծը ներկայացնում է մեկ ամսվա ընթացքում ամենից շատ վաճառված մանկական գրքերի ցանկը:

Քնելուց առաջ հեքիաթներ լսել սիրում են բոլոր փոքրիկները: Առաջին հորիզոնականում է «Հեքիաթներ քնելուց առաջ»ժողովածուն: Այն ներառում է պարտադիր ընթերցանության յուրահատուկ հեքիաթներ:

Մեր ցանկ է վերադարձել և երկրորդ հորիզոնականը զբաղեցրել «Շաղգամը»գիրք-փազլը: Հեքիաթի առանցքում համատեղ ուժերով նպատակին հասնելու գաղափարն է: Շաղգամը հողից հանելու համար պապիկին օգնության հասած թոռնիկին են միանում շունը, կատուն, անգամ մուկը:

ՀանսՔրիստիանԱնդերսենի«Հեքիաթներ»-ը մեկ հորիզոնականով զիջել են իրենց դիրքերը և երրորդն են: Անդերսենյան գործերըքաջ հայտնի են բոլոր փոքրիկներին ոչ միայն գրքերից, այլև մուլտֆիլմերից ու լիամետրաժ խաղարկային ֆիլմերից, քանի որ դրանց զգալի մասն էկրանավորվել է:

Առաջինից չորրորդ հորիզոնական են հասելՀովհաննես Թումանյանի «Հեքիաթներ»-ը:Թումանյանի ստեղծագործությունները, մասնավորապես, հեքիաթները, որոնք թարգմանվել են աշխարհի տարբեր լեզուներով, մշտապես հետաքրքրել են ընթերցողներին: Դրանք միշտ պահանջված են բոլոր սերունդներիկողմից, հաճույքով են կարդում նաև մեծահասակները: Հեքիաթների հիմքում ընկած են ժողովրդական թեմաներն ու պատումները:

Հինգերորդ տեղում «Երեք պատմվածք Շերլոք Հոլմսի արկածներից»գիրքն է: Գրքում ներկայացված են Արթուր Կոնան Դոյլի՝ շատերի կողմից սիրված հերոս Շերլոկ Հոլմսի զանազան արկածները:

Ջ. Ռոուլինգի «Հարի Փոթերը և փիլիսոփայական քարը»գիրքը կրկին մեր ցանկում է: Այն զբաղեցրել է վեցերորդ տեղը: Առաջին անգամ այն լույս է տեսել 20 տարի առաջ: Վեպի հիման վրա 2001 թվականին նկարահանվել է համանուն ֆիլմը, որը մեծ աղմուկ է բարձրացրել ու արժանացելև՛ փոքրիկների, և՛ մեծահասակների ուշադրությանը:

Յոթերորդ հորիզոնականում է Ղազարոս Աղայանի«Անահիտ»հեքիաթը: Այն Վաչագանի և Անահիտի սիրո, խիզախության, աշխատասիրության, նվիրվածության մասին է: Հեքիաթի մոտիվներով նաև մուլտֆիլմ է նկարահանվել:

«Հայ ժողովրդական հեքիաթներ»-ն այս անգամ ութերորդն է: Գրքում ներկայացված են հեքիաթներ, որոնք չափազանց հետաքրքիր են և դաստիարակչական նշանակություն ունեն:

Իններորդ տեղում է Լուիս Քերոլի «Ալիսը հրաշքների աշխարհում» հանրահայտ ստեղծագործությունը: Լուիս Քերոլն ամաչկոտ, կակազող մաթեմատիկոս Օքսֆորդի համալսարանի Քրայսթ Չըրչ քոլեջից, հորինեց պատմություն մի փոքրիկ աղջկա մասին, ով գլորվում ընկնում է Ճագարի բույնը. այդպես են սկսվում Ալիսի անմահ արկածները: Հեքիաթի անսովոր մթնոլորտն ու արտասովոր հերոսները հրապուրել են և՛ ճշգրիտ, և՛ հումանիտար գիտությունների ոլորտի մարդկանց, ովքեր ըստ իրենց են մեկնաբանել Ալիսի յուրաքանչյուր քայլը, արկածը, խոսքը:

Ամենավաճառվածների ցանկը եզրափակում է Լուիս Քերոլի «Ալիսը հայելու աշխարհում» գիրքը: Այն «Ալիսը հրաշքների աշխարհում» հեքիաթի շարունակությունն է: Քերոլի ստեղծած Ալիսը նվաճել է ոչ միայն անգլիացի, այլև աշխարհի տարբեր անկյուններում ապրող ընթերցողների սերն ու համակրանքը:Հայելու աշխարհում Ալիսը հայտնվում է հակոտնյա երևույթների լաբիրինթում: Հանդիպելով շախմատային սպիտակ թագուհուն` ինքն էլ է ցանկանում դառնալ թագուհի, իսկ դրա հնարավորությունն ունի յուրաքանչյուր զինվոր, եթե միայն անվտանգ հաղթահարի բոլոր փորձությունները ու հասնի շախմատի մյուս ծայրին գտնվող 8-րդ վանդակին… շախմատի վանդակները տարօրինակ աշխարհներ են, որտեղ ապրում են խոսող ծաղիկներ, գուլպաներ գործող այծ, Պստլիկ Հաստլիկը, անվերջանալի բանաստեղծություններ արտասանող Չըրխկն ու Դըրխկը, Միաեղջյուրը և շատ ու շատ ուրիշներ:

Վարկանիշային ցուցակի կազմման հարցումներին մասնակցել են «Բուկինիստ» (53-74-13) և «Զանգակ» (23-26-49) գրախանութների ցանցերը: Հարցման ժամանակ հաշվի չեն առնվել դասագրքերը:

Տեղ	Գիրք		Հրատ.	Քանակ
1		«Հեքիաթներ քնելուց առաջ»	Բուկինիստ	68
2		«Շաղգամը» գիրք փազլ	Բուկինիստ	59
3		Հանս Քրիստիան Անդերսեն «Հեքիաթներ»	Արևիկ	31
4		Հովհաննես Թումանյան «Հեքիաթներ»	Արևիկ	25
5		«Երեք պատմվածք Շերլոկ Հոլմսի արկածներից»	Անդրանիկ	24
6		Ջ. Ռոուլինգ «Հարի Փոթերը և փիլիսոփայական քարը»	Զանգակ	19
7		Ղազարոս Աղայան «Անահիտ»	Արևիկ	14
8		«Հայ ժողովրդական հեքիաթներ»	Արևիկ	12
9		Քերոլ Լուիս «Ալիսը հրաշքների աշխարհում»	Զանգակ	11
10		Քերոլ Լուիս «Ալիսը հայելու աշխարհում»	Զանգակ	10

«Մանկական բեսթսելերը» ներկայացրեց Անժելա Համբարձումյանը