3 րոպեի ընթերցում
ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ:«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր՝ հուլիսի 4-ին, կայանալու է Հավաքական անվտանգության մասին պայմանագրի կազմակերպության արտաքին գործերի նախարարների խորհրդի նիստը: Անդամ երկրների պատվիրակությունների ղեկավարներին և ՀԱՊԿ գլխավոր քարտուղարին կընդունի ՀԱՊԿ Հավաքական անվտանգության խորհրդի նախագահ, Հանրապետության Նախագահ Սերժ Սարգսյանը: Նիստը կանցկացվի ՀՀ արտգործնախարարի նախագահությամբ, որից հետո Էդվարդ Նալբանդյանը և Նիկոլայ Բորդյուժան հանդես կգան մամուլի համար հայտարարություններով:
Հուլիսի 5-ը Հայաստանի Հանրապետության Սահմանադրության եւ պետական խորհրդանշանների օրն է: Օրվան ընդառաջ «Մենք» պետական եւ ազգային արժեքների հանրահռչակման հիմնադրամի հիմնադիր և գլխավոր տնօրեն Պավել Սարգսյանը կներկայացնի տեղեկատվություն այդ օրը սպասվող միջոցառումների, տոնական քայլերթի մասին: Սահմանադրության մասին էլ կխոսի ՀՀ Արդարադատության նախարարության Օրենսդրության զարգացման և իրավական վերլուծության վարչության պետ Բագրատ Ղազինյանը:
Լրագրողների հետ կհանդիպի Հայաստանում Եվրամիության պատվիրակության ղեկավար, դեսպան Պյոտր Սվիտալսկին: Եվրամիության դեսպանը կներկայացնի Եվրոպական միության արտաքին եւ անվտանգության քաղաքականության համաշխարհային ռազմավարությունը, կանդրադառնա Մեծ Բրիտանիայում անցկացված՝ Եվրամիությունից դուրս գալու մասին հանրաքվեի արդյունքներին:
Աշնանը Վրաստանում սպասվում են խորհրդարանական ընտրություններ: Երկրում քաղաքական ուժերը պատրաստվում են ընտրապայքարին: Ինչպիսի՞ ընտրապայքար է կանխատեսվում, ինչպիսի՞ն կլինի Վրաստանի հայ համայնքի մասնակցությունն ընտրություններին: Այս և այլ հարցերի վերաբերյալ իր վերլուծությունը կներկայացնի վրացագետ Ջոնի Մելիքյանը:
Երևանում կկայանա «Հայաստանում նեոնատոլոգիայի զարգացումը» միջազգային համաժողովը: Այն կազմակերպել է Հայկական ակնաբուժության նախագիծը: Միջազգային համաժողովին կքննարկվեն նեոնատոլոգիային եւ անհասության ռետինոպաթիային վերաբերող հարցեր: Հրավիրված են մասնագետներ ԱՄՆ-ից:
Լրագրողների ու Ազգային ժողովի պայքարը տեղափոխվում է մարզադաշտ: Երեւանի «Դինամո» մարզադահլիճում այսօր կայանալու է ֆուտբոլային հանդիպում ՀՀ Ազգային ժողովի եւ ՀՀ ԱԺ-ում հավատարմագրված լրագրողների հավաքականների միջեւ: Նշենք, որ երկու կողմերն էլ խոստանում են մեկը մյուսի նկատմամբ ջախջախիչ հաղթանակ տանել:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: