4 րոպեի ընթերցում
ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ:«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Պատրաստ է վերարտադրողական առողջության բարելավման ռազմավարությունը և 2016-2020 թվականների գործողությունների ծրագիրը: Դրանք այսօր` հունիսի 23-ին, կքննարկվի կառավարության հերթական նիստում: Նիստի օրակարգային մեկ այլ հարցով էլ գործադիրը կհաստատի նախնական և միջին մասնագիտական ուսումնական հաստատությունների 2016-2017 ուսումնական տարվա անվճար ուսուցմամբ ընդունելության տեղերը:
Հունիսի 25-ին անցկացվելու են ՏՏ ոլորտի «Seedstars Երևան» և «IBM ISTC Startup Challenge» մրցույթները: Մրցույթների նպատակն է խթանել ինովացիայի զարգացումը Հայաստանում, աջակցել սկսնակ ընկերություններին և թիմերին` իրենց գաղափարներն ու նախագծերը իրականություն դարձնելու հարցում: Ձեռնարկությունների ինկուբատոր հիմնադրամի տնօրեն Բագրատ Ենգիբարյանը, «Մայքրոսոֆթ ինովացիոն կենտրոն Հայաստան»-ի տնօրեն Արտաշես Վարդանյանը, «Seedstars World»-ի տարածաշրջանային ղեկավար Իգոր Օվչարենկոն, և «Բեթկոնստրակտ» ընկերության գլխավոր գործադիր տնօրեն Վահե Բալուլյանը կներկայացնեն մրցույթի մանրամասները:
Հայաստանյան փորձագիտական, քաղաքական դաշտում շարունակում է քննարկվել Սարգսյան-Ալիև-Պուտին հանդիպումը: Քաղաքական, քաղաքագիատական ոլորտից տարբեր ներկայացուցիչներ կխոսեն ղարաբաղյան խնդրի շուրջ սպասվող զարգացումներից:
Հարկային նոր օրենսգիրքին ու արդի տնտեսական մարտահրավերներին կանդրադառնա Ամերիկյան առևտրի պալատի նախագահ, «Ամերիա» բանկի զարգացման գծով տնօրեն Տիգրան Ջրբաշյանը: Հիշեցնենք, որ բիզնես ոլորտի ներկայացուցիչներն իրենց մտահոգություն էին հայտնել նոր օրենսգրքի վերաբերյալ` նշելով, որ այն չի նպաստի բիզնես միջավայրի բարելավմանը:
«Էլեկտրիկ Երևան»-ի պայքարից անցել է մեկ տարի: Ի՞նչ արդյունքեր են գրանցվել մեկ տարի անց: Հասարակական կազմակերպությունների ներկայացուցիչները, փաստաբանները կանդրադառնան թեմային: Հիշեցնենք, որ մեկ տարի առաջ էլեկտրաէներգիայի սակագնի թանկացման դեմ մեծ բողոքի ալիք բարձրացավ: Ցուցարարները դեմ էին արտահայտվում թանկացմանը և պահանջում Հայաստանի էլեկտրական ցանցեր ընկերության տնօրենի հրաժարականը:
Հայոց ցեղասպանության թանգարան-ինստիտուտում կկայանա պատմաբան Միքայել Հեզեմաննի դասախոսությունը: Վատիկանը և Հայոց ցեղասպանությունը» խորագրի ներքո գերմանացի պատմաբանը կներկայացնի Հռոմի Սուրբ Աթոռի արխիվներում կատարած իր ուսումնասիրության արդյունքները Հայոց ցեղասպանության հետ կապված փաստաթղթերի վերաբերյալ:
Վերականգնում ենք ազգային տոները և պատրաստվում ենք նշել Վարդավառը: Ինչպես և որտեղ նշել տոնը: Թեմայի վերաբերյալ իրենց դիտարկումները կներկայացնեն Արարատյան Հայրապետական թեմի երիտասարդաց միությունների համակարգող Տ. Պետրոս ավագ քահանա Մալյանը, Նորաբացի Ս. Աստվածածին եկեղեցու երիտասարդաց միության ատենապետ Արևիկ Ուզունյանը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: