4 րոպեի ընթերցում
ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ:«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Անկարայից թուրք փաստաբան Մելիհ Աքքուրթը դիմել է Գերմանիայի Սահմանադրական դատարան Բունդեսթագի կողմից Հայոց ցեղասպանությունը ճանաչող բանաձևը չեղյալ համարելու հայցով: Գերմանիայի Բունդեսթագի կողմից Հայոց ցեղասպանության ճանաչման գործընթացում իրավական ի՞նչ հնարավոր զարգացումներ կարող են լինել: Այս և այլ հարցերին այսօր` հունիսի 15-ին, կանդրադառնա միջազգային իրավունքի փորձագետ Վլադիմիր Վարդանյանը:
Երևանի երկաթուղային կայարանից այսօր կմեկնի Երևան-Բաթումի-Երևան երթուղում գործող այս տարվա առաջին գնացքը, որով էլ կբացվի երկաթուղային ուղևորափոխադրումների ամառային սեզոնը: Մինչ գնացքի մեկնելը, Ուղևորափոխադրումների տնօրինության պետ Գագիկ Մովսեսյանը կներկայացնի երթուղու պայմանները:
ՓՄՁ շահերը պաշտպանող ձեռներեցների կոնֆեդերացիայի անդամները բարձրաձայնում են մենաշնորհի հարցը: Նրանք կխոսեն երևույթի բացասական հետեւանքների, դրանք վերացնելու պայքարի ձևերի, երկրում իրական ազատ մրցակցային միջավայր ստեղծելու և ոլորտը կարգավորելու հնարավոր տարբերակների մասին: ՓՄՁ ներկայացուցիչները կանդրադառնան նաև «Հարկային օրենսգրքում» նախատեսվող փոփոխություններին:
Հունիսի 17-ն անապատացման դեմ պայքարի միջազգային օրն է: Օրվան ընդառաջ Հայաստանի տարածքների անապատացման հիմնախնդիրների մասին խոսելու են Էկոլոգիայի միջազգային ակադեմիայի ակադեմիկոս Աշոտ Խոյեցյանը, Հանրային խորհրդի գյուղատնտեսական և բնապահպանական հարցերի աշխատանքային խմբի ղեկավար Ստեփան Խոյեցյանը։
Հուլիսին անցկացվելու է «Ոսկե ծիրան» Երևանի միջազգային 13-րդ կինոփառատոնը: Այսօր տեղի է ունենալու առաջին մամուլի ասուլիսը, որի ընթացքում կներկայացվեն հիմնական ծրագրերը և պաշտոնական ազդագիրը:
ՀՀ կրթության և գիտության նախարարությունում էլ 2016 թ. առարկայական օլիմպիադաների հաղթողները կստանան դիպլոմները: Դիպլոմները կհանձնի ԿԳ նախարար Լևոն Մկրտչյանը:
Թարգմանչաց տոնի առթիվ հունիսի 15-ին և 16-ին Երևանի քաղաքապետարանը հրավիրում է մասնակցելու ժամը 11:00-ից մեկնարկող «Ընթերցող Երևան» գրքի ցուցահանդես-տոնավաճառին: Նախատեսված են գրքերի շնորհանդեսներ, կներկայացվեն նոր հրատարակված մանկական, մասնագիտական, գեղարվեստական գրքեր, թարգմանություններ: Ցուցահանդես-տոնավաճառին ներկաները հնարավորություն կունենան ձեռքբերել դասական ու արդի գրականության լավագույն նմուշներ, իսկ ժամը 20:00-ից վայելել գրական բոհեմ համերգ-երեկո պոետների, երգիչ-երգահանների ու ասմունքողների մասնակցությամբ:
Կոմիտասի անվան կամերային երաժշտության տանն անցկացվելու է «Գրան պրի» մրցանակակիր «Նշխարք» վոկալ անսամբլի առաջին մենահամերգը: Այս տարի «Վերադարձ» միջազգային փառատոնի «Վոկալ անսամբլ» անվանակարգում «Նշխարք» անսամբլը արժանացել է «Գրան պրի» մրցանակի:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: