Լևոն Մկրտչյանն այցելել է «Մխիթար Սեբաստացի» կրթահամալիր

ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ: ՀՀ կրթության և գիտության նախարար Լևոն Մկրտչյանն հունիսի 13-ին այցելել է «Մխիթար Սեբաստացի» կրթահամալիր, որտեղ տրվել էր ամենամյա բաց «Բանգլադեշյան պլեներ 2016»-ի, լրացուցիչ ամառային ճամբարների, պատանեկան ամառային աշխատանքի, մանկավարժության ճամբարների մեկնարկը: Ամառային ճամբարին մասնակցում են պատանիներ` ՀՀ մարզերից, Արցախից և Վրաստանից: Լևոն Մկրտչյանը շրջել է կրթահամալիրում, ծանոթացել նյութատեխնիկական բազային, իրականացվող ամառային ծրագրերին:Այս մասին «Արմենպրես»-ին տեղեկացրին ՀՀ կրթության և գիտության նախարարության հասարակայնության հետ կապերի և տեղեկատվության վարչությունից:

Լրագրողների հետ զրույցում նախարարը նշել է, որ վերջին անգամ կրթահամալիրում եղել է 7-8 տարի առաջ, և փոփոխությունները բավականին զգալի են: «Նախևառաջ` ամառային ճամբարի գաղափարն ամբողջությամբ իրականացված է: Մենք պետք է կրթական ծրագրերում ավելի մեծ ուշադրություն դարձնենք գործնական աշխատանքներին: Արտադպրոցական կրթությունը շատ կարևոր է երեխայի ձևավորման հարցում: Առհասարակ, կրթությունը հենված է երկու բազային արժեքների վրա՝ ազատություն և պատասխանատվություն, և ինչքանով սահուն է այդ անցումը, այնքան մեծ է հանրակրթական դպրոցի առաքելությունը: «Մխիթար Սեբաստացի» կրթահամալիրն այն դպրոցներից է, որտեղ այդ անցումը սահուն է. շատ հաճախ ջնջված է տարիքային անջրպետը, և գործում է ուսուցիչ-աշակերտ հետաքրքիր ձևաչափ: Եթե մենք կարողանանք լրացուցիչ կրթության գաղափարը կյանքի կոչել, մեծ արդյունք կստանանք: Օրինակ, եթե յուրաքանչյուր առարկայի չափորոշիչում սահմանվի, որ գործնական հատվածը պարտադիր լինի, իսկապես փոփոխության կբերի: Գուցե լրացուցիչ կրթությունը մտցվի ուսուցիչների ծանրաբեռնվածության մեջ, այնուհետ փորձենք արագացնել ավագ դպրոցին անհրաժեշտ անհետաձգելի բարեփոխումները, և առհասարակ վերանայենք հանրակրթության բոլոր չափորոշիչները»,-նշել է նախարարը` ընդգծելով, որ շատ հարցերում «Մխիթար Սեբաստացի» կրթահամալիրը բավականին լավ վիճակում է և ունի բյուջետային հատուկ ֆինանսավորում:

«Երեխան պետք է կարողանա հասկանալ, թե դպրոցում ձեռքբերած գիտելիքներն ինքն ինչպես պետք է օգտագործի: Դա շատ կարևոր է: Այս դպրոցում մանկավարժները կարողանում են բազմակողմանի հետաքրքրություններ առաջացնել աշակերտների մոտ»,- հավելել է նախարարը:

Կրթահամալիրի տնօրեն Աշոտ Բլեյանն անդրադարձել է հաստատության կազմակերպած ամառային ծրագրերին` շեշտելով, որ դրանք լավ հնարավորություն են թե՛ երեխաների, թե՛ մանկավարժների համար: «Չի կարելի երեք ամիս արձակուրդի անունը դնել` մենք «պրծանք» դպրոցից: Ամռանն իրական հնարավորություններ են ստեղծվում»,- ասել է նա` հավելելով, որ շուտով կրթօջախը կունենա ուսումնական ձիարշավարան և նոր լողավազան: