4 րոպեի ընթերցում
ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ:«Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր՝ մայիսի 10-ին, Երևանի Լեոյի անվան թիվ 65 դպրոցում կայանալու է ցերեկույթ՝ նվիրված 1994թ Օմարի լեռնանցքում քաջաբար զոհված, «Մարտական խաչ» 2-րդ աստիճանի շքանշանի ասպետ, Լեոյի անվան թիվ 65 դպրոցի շրջանավարտ Գևորգ Ղազարյանին: 1994 թ. հունվարի 19-ին՝ մարտերից մեկի ժամանակ, պետք էր կազմակերպել տղաների հարկադիր նահանջը և զինվորներին հնարավորություն տալ պաշտպանական նոր դիրքեր գրավել: Նահանջի ժամանակ հակառակորդի գնդակից վիրավորվում է հրամանատար ավագ-լեյտենանտ Վլադիմիր Վերդյանը: Գևորգը սողալով մոտենում է նրան՝ փորձելով դուրս բերել կրակի գծից: Այդ ժամանակ Գևորգը մեջքից վիրավորվում է, և շարժվելն անհնարին է դառնում: Նկատելով վիրավորներին՝ նենգ թշնամին առաջ է շարժվում: Երբ արդեն մեկ տասնյակից ավելի ազերիներ մոտեցել էին տղաներին, Գևորգը, գրկելով հրամանատարին, քաշում է վերջին նռնակի օղակը: Այսօր Գևորգի հարազատները, ընկերները մեկ անգամ ևս կանդրադառնան նրա հերոսություններին:
Մայիսյան հաղթանակների թեման կլինի «Ժառանգություն» կուսակցության անդամ Անահիտ Բախշյանի և Երեւանի տիկնիկային թատրոնի գեղարվեստական ղեկավար Ռուբեն Բաբայանի քննարկման թեման: Նրանք կանդրադառնան նաև սահմանային ներկա իրավիճակին, ինչպես նաև թե ի՞նչ կերպ է կազմակերպվում զոհված և վիրավոր զինծառայողների ընտանիքներին հատկացվող օգնությունների գործընթացը:
Թուրքիայում ազգայնականության դեմ մղվող պայքարի համատեքստում ստեղծվում է ազգային փոքրամասնությունների դաշինք: «Արեւմտահայոց Ազգային Համագումար» միջազգային կազմակերպության անդամ, Աժ պատգամավոր Արագած Ախոյանը և պատմական գիտությունների դոկտոր Վահան Մելիքյանը մանրամասներ կներկայացնեն ստեղծվող դաշինքի գործունեության ու նպատակների մասին: Թուրքագետ Հակոբ Չաքրյանն էլ կխոսի Թուրքիայում սկսված քաղաքական ճգնաժամի ու նոր վերադասավորումների մասին:
ՀՀ ԱԻՆ «Ճգնաժամային կառավարման ազգային կենտրոն»-ն ամփոփում է 911 ծառայության եռամսյակային տվյալները: «Ճգնաժամային կառավարման ազգային կենտրոն»-ի պետ, գնդապետ Հովհաննես Խանգելդյանը կներկայացնի արտակարգ պատահարների թիվը, վերհանած խնդիրներն ու առաջիկա ծրագրերը:
Սպառողական շուկայում ինչպիսի՞ գնային տատանումներ են գրանցվել ընթացիկ տարվա հունվար-ապրիլ ամիսներին, ո՞ր ապրանքատեսակներն են թանկացել, իսկ որոնք՝ էժանացել: ՀՀ ազգային վիճակագրական ծառայության նախագահի խորհրդական Գուրգեն Մարտիրոսյանը կներկայացնի գնային փոփոխությունները:
Ստեփանակերտի «Աղ ու հացով» ուրախների և հնարամիտների ակումբի թիմը նոր է վերադարձել Կրասնոդարից, որտեղ 1/8 եզրափակիչը հաղթել է առաջին տեղով և անցել 1/4-րդ եզրափակիչ: Այսօր լրագրողների հետ հանդիպմանը թիմի անդամները կներկայացնեն խաղից առաջ չլուծված խնդիրները, խաղի ընթացքում ծագած դժվարությունները:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: