4 րոպեի ընթերցում
ԵՐԵՎԱՆ, 27 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Հալաբյան փողոցում ավտոբոսում տեղի ունեցած պայթյունն առիթ է մեկ անգամ ևս վերհանելու հասարակական տնրանսպորտի խնդիրները: Այսօր` ապրիլի 27-ին, հասարակական տրանսպորտի խնդիրների մասին կխոսեն «Իրազեկ և պաշտպանված սպառող» ՀԿ նախագահ Բաբկեն Պիպոյանը, ««Աքիլես» ավտովարորդների իրավունքների պաշտպանության կենտրոն» ՀԿ նախագահ Էդուարդ Հովհաննիսյանը եւ «Սպառողների խորհրդատվության կենտրոն» ՀԿ նախագահ Կարեն Չիլինգարյանը: Հիշեցնենք, որ Հալաբյան փողոցում ավտոբուսի պայթյունի ահաբեկչության վարկածն ամբողջությամբ հերքվել է: Ի դեպ, այսօր գումարվելու է Երևան քաղաքի ավագանու նիuտ:
Ղարաբաղա-ադրբեջանական շփման գծում իրավիճակը շարունակում է անհանգիստ մնալ: Ադրբեջանական կողմը պարբերաբար խախտում է հրադադարի ռեժիմը` թիրախավորելով նաև խաղաղ բնակավայրերը: Հայկական կողմն էլ կոչ է անում միջազգային հանրությանը պարտավորեցնել Ադրբեջանին խստորեն հետևելու 1994 թվականի զինադադարի համաձայնագրին: Ղարաբաղյան հարցի վերջին զարգացումների մասին իրենց դիտարկումներն են ներկայացնելու Արտակարգ եւ լիազոր դեսպան Արման Նավասարդյանը, ՀԿԿ առաջին քարտուղար Տաճատ Սարգսյանը, ՕԵԿ պատգամավոր Մհեր Շահգելդյանը:
Ապրիլի սկզբի չորսօրյա պատերազմի օրերին և դրանից հետո խոսվեց զինվորների հերոսությունների, սահամանագծին կատարած նրանց սխրանքների մասին: Այդ օրերին, թերևս, քիչ անդրադարձ եղավ ռազմական բժիշկների գործունեությանը: Այսօր հերթը ռազմական բժշիկներինն է: ՀՀ ԶՈՒ ռազմաբժշկական վարչության պետ Կամավոր Խաչատրյանը եւ ՀՀ ԶՈՒ ռազմաբժշկական վարչության պետի տեղակալ Տիգրան Ավետիսյանը կխոսեն համակարգի բուժսարքավորումների հագեցվածության, ռազմական բժիշկների մասնագիտական որակների եւ ոլորտին առնչվող հարցերի մասին: Նրանք կանդրադառնան նաև ապրիլի սկզբին ղարաբաղա-ադրբեջանական շփման գծում մարտական գործողությունների ժամանակ ռազմական բժիշկների դերի ու նշանակության, նրանց կատարած աշխատանքին:
Հայկական բարեգործական ընդհանուր միությունը ներկայացնում է Նազիկ Արմենակյանի «Վերապրածները» մեծածավալ լուսանկարչական նախագիծը: Համանուն նախագծի եւ գրքի շնորհանդեսը վերջերս տեղի է ունեցել Նյու Յորքում: «Վերապրածները» հայերեն-անգլերեն երկլեզու գիրքը հրատարակվել է Հայոց Ցեղասպանության 100-րդ տարելիցի շրջանակներում:
«Ձոն հայորդիներին» խորագիրը կրող համերգային ծրագիր՝ նվիրված սահմանները պաշտպանող զինվորներին և Արցախի՝ ապրիլյան մարտում հերոսաբար զոհված մարտիկների հիշատակին: Ծրագրի ընթացքում կհնչեն հայրենասիրական երգեր, կկայանա երեք երգի պրեմիերա: Համերգային ծրագիրը ներկայացնում է «Արփա» հեղինակ-կատարողների միությունը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: