3 րոպեի ընթերցում
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ:«Արմենպրես»լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Ի՞նչ արտոնությունների ցանկ է սահմանված մարտական գործողություների հետևանքով վիրավորված զինծառայողներին աջակցելու համար: Ի՞նչ դրամական աջակցության պետական ծրագրեր կան՝ նախատեսված զոհված զինծառայողների ընտանիքների համար: Այսօր` ապրիլի 18-ին, ՀՀ ՊՆ Զինծառայողների սոցիալական պաշտպանության վարչության պետ, գնդապետ Սերժ Առուշանյանը և Սոցիալական ապահովության պետական ծառայության պետի տեղակալ Սմբատ Սաիյանը մանրամասն կանդրադառնան վերը նշված հարցերին:
Հայաստանյան քաղաքական, հասարակական դաշտը շարունակում է քննարկել չորսօրյա պատերազմը, ղարաբաղյան խնդրի շուրջ ընթացող զարգացումները: «Մոդուս Վիվենդի» կենտրոնի ղեկավար Արա Պապյանը, ԱԺ պատգամավորներ Ռուբեն Հակոբյանը, Մկրտիչ Մինասյանը և այլ գործիչներ իրենց դիտարկումները կներկայացնեն թեմայի վերաբերյալ: Նրանք կանդրադառնան ներքաղաքական հարցերին, Հայաստանի առաջին և երրորդ նախագահների հանդիպմանը:
Ղարաբաղյան թեման չեն շրջանցի նաև ՀՀ ԳԱԱ Պատմության ինստիտուտի տնօրեն Աշոտ Մելքոնյանն ու Պատմության ինստիտուտի Հայկական հարցի և հայոց ցեղասպանության պատմության բաժնի վարիչ Արմեն Մարուքյանը: Նրանք կխոսեն նաև Հայոց ցեղասպանության միջազգային ճանաչման գործընթացից, հայկական կողմի անելիքներից, ինչպես նաև կներկայացնեն Պատմության ինստիտուտի ծրագրերը:
ՀՀ բարձրագույն որակավորման հանձնաժողովում բարեփոխումներ են սպասվում: Հանձնաժողովի նախագահ Լիլիթ Արզումանյանը լրագրողների հետ հանդիպմանը կներկայացնի, թե ինչ բարեփոխումների մասին է խոսքը, ինչպես նաև կխոսի նոր ծրագրերից:
ՅՈՒՆԵՍԿՕ-ի որոշմամբ ապրիլի 18-ը նշվում է որպես Հուշարձանների և տեսարժան վայրերի միջազգային օր: Օրվա առթիվ «Զվարթնոց» պատմամշակութային արգելոց-թանգարանում կբացվի «Նուռը և խաղողը հայ ճարտարապետության զարդաքանդակներում» ցուցահանդեսը: Կներկայացվեն չափագրությունների և լուսանկարների ֆոնդերում պահվող նյութեր, հուշարձանագետ Սամվել Կարապետյանի տրամադրած՝ Ախթամարի սուրբ Խաչ եկեղեցու լուսանկարները, հնագետ Բորիս Գասպարյանի տրամադրած նյութերը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: