4 րոպեի ընթերցում
ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` ապրիլի 12-ին, ՀՀ էկոնոմիկայի նախարար Արծվիկ Մինասյանը կայցելի «Մերիդիան» ազատ տնտեսական գոտի և Նոր Հաճնի մի շարք ադամանդագործական ընկերություններ: «Մերիդիան» ազատ տնտեսական գոտում նախարարը կծանոթանա ազատ առևտրի գոտու գործունեությանը, որից հետո տեղի կունենա հանդիպում-քննարկում՝ ազատ տնտեսական գոտում գործող ընկերությունների ներկայացուցիչների մասնակցությամբ՝ նվիրված ոլորտին առնչվող խնդիրներին: Նախատեսված է նաև հանդիպում ադամանդագործության ոլորտի ընկերությունների հետ:
Մեկնարկում է «Երևանում Նոբելյան օրեր» գիտական միջոցառումը: Հինգ Նոբելյան մրցանակակիրներն արդեն Երևանում են: Ովքե՞ր են նրանք և ի՞նչ գիտական հայտնագործություններ են կատարել: Այս և այլ հարցերի պատասխանները կներկայացվեն այսօր: Նոբելյան մրցանակակիրները հանդես կգան դասախոսություններով, կայցելեն Մայր Աթոռ Սուրբ Էջմիածին,Մատենադարան, Հայոց ցեղասպանության թանգարան ինստիտուտ և այլուր:
Ապրիլի 12-ին նախատեսված է Հայաստանում Գերմանական տնտեսական միավորման հանդիսավոր բացումը: Գերմանական տնտեսական միավորումը 2013թ. մարտից Երևանում ներկայացված էր իր ճյուղային գրասենյակով, այժմ արդեն հիմնական գրասենյակի բացումն է: Գերմանական տնտեսական միավորման նպատակն է աջակցել Գերմանիայի առևտրատնտեսական հարաբերություններին և գերմանական տնտեսության շահերը ներկայացնել Հայաստանում, Վրաստանում։ Բացի դրանից, միավորումն ակտիվ աջակցություն է ցուցաբերում այն գերմանական ընկերություններին, որոնք ցանկանում են մուտք գործել հայկական և վրացական շուկա:
Մեկնարկում են Սանկտ Պետերբուրգի բալետի պետական ակադեմիական թատրոնի երևանյան հյուրախաղերը։ Սանկտ Պետերբուրգի բալետի պետական ակադեմիական թատրոնի հայաստանյան հյուրախաղերի համակարգող Նիկա Բաբայանը, բալետմայստեր, ՌԴ ժողովրդական արտիստ Բորիս Էյֆմանը, «Լուզինյան հիմնադրամ»-ի տնօրեն Կոնստանտին Լուզինյան-Ռիժինաշվիլին լրագրողների հետ հանդիպմանը մանրամասն կներկայացնեն հյուրախաղերի ծրագիրը:
Ղարաբաղյան թեմայի շուրջ քննարկումները շարունակվում են: Իրանագետ Արմեն Իսրայելյանը, թուրքագետ Լևոն Հովսեփյանը, վրացագետ Ալիկ Էրոյանցը կներկայացնեն Իրանի, Թուրքիայի, Վրաստանի արձագանքը ղարաբաղա-ադրբեջանական շփման գծում Ադրբեջանի սադրիչ գործողություններին: Կենտրոնական հրամանատարության հետախույզ, դիվերսիոն հատուկ նշանակության ջոկատի հիմնադիր հրամանատար Վովա Վարդանովը կխոսի քառօրյա պատերազմի դասերից, ՀՀ ԳԱԱ Հայոց ցեղասպանության թանգարան-ինստիտուտի տնօրեն, պատմական գիտությունների դոկտոր Հայկ Դեմոյանն էլ կներկայացնի դիտարկումներ հայկական կողմի անելիքների մասին:
Սյունիքի մարզի Եղվարդ գյուղում գանձագողերի գործունեության հետևանքով հայտնաբերվել են ուշագրավ գտածոներ` ուրարտական ժամանակաշրջանի զինվորի բրոնզե արձանիկ և այլն: Պատմամշակութային ժառանգության գիտահետազոտական կենտրոնի փոխտնօրեն Հակոբ Սիմոնյանը և ՀՀ ԳԱԱ Հնագիտության և ազգագրության ինստիտուտի տնօրեն Պավել Ավետիսյանը կներկայացնեն, թե ինչ է պարզվել լաբորատոր փորձաքննության արդյունքում, ինչ արժեք են ներկայացնում գտածոները:
Հայաստանի նկարիչների միությունը կազմակերպում է իր պահոցներում գտնվող 1960-80 թվականների նկարիչների 80 լավագույն ստեղծագործությունների ցուցահանդես-վաճառք, որի ամբողջ հասույթը կտրամադրվի Արցախին: Ցուցահանդես-վաճառքը կգործի ապրիլի 12-23-ը:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: