5 րոպեի ընթերցում
ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` մարտի 31-ին, կառավարության հերթական նիստն է: Օրակարգում ընդգրկված են մի շարք հարցեր տարբեր ոլորտներից: Մասնավորապես, կքննարկվի Ալ. Թամանյանի թանգարան-ինստիտուտը Ճարտարապետության ազգային թանգարան-ինստիտուտին միացնելու հարցը: Օրակարգային մեկ այլ հարցով էլ կառավարությունը Մեղրի և Ագարակ համայնքների գազի բաշխման ցանցի կառուցման ծրագրի գլխավոր կապալառու իրանական «Սաներջի» ընկերությանը կթույլատրի իրականացնել շինարարական գործունեություն:
Մեկնարկում է Կենտրոնական բանկի նախաձեռնությամբ իրականցվող «Իմ ֆինանսների միամսյակ» ծրագիրը: Նպատակն է ևս մեկ անգամ կարևորել անձնական ֆինանսների կառավարումը: Մեկ ամսվա ընթացքում անցկացվելու են բազմապիսի տեղեկատվական եւ ուսուցողական միջոցառումներ:
ՀՀ ԳԱԱ Հնագիտության և ազգագրության ինստիտուտը ներկայացնում է 2015 թվականի պեղումների արդյունքները, 2016 թվականի համար նախատեսված դաշտային հետազոտությունների նպատակները: Անդրադարձ է կատարվելու Վիշապ քարակոթողի ուսումնասիրությունների արդյունքներին, «Սոլակ 1» հնավայրում հայ-իտալական արշավախմբի աշխատանքներին:
Ամենայն Հայոց Կաթողիկոսի օրհնությամբ և Ռուս Ուղղափառ, Հայ Առաքելական Ս.Եկեղեցիների աջակցությամբ կկայանա «Ավանդական արժեքներ. ժամանակակից հասարակության զարգացման հոգևոր-բարոյական ուղենիշները» խորագրով միջազգային գիտաժողով: Ռուսաստանի և Հայաստանի փորձագետները կքննարկեն ժամանակակից հասարակության զարգացման ավանդական արժեքներն ու հոգևոր-բարոյական ուղենիշերը:
Հանրապետականները շարունակում են քննարկել «Ընտրական օրենսգրքում» սպասվող փոփոխությունները: Հերթական անգամ իր դիտարկումները կներկայացնի ՀՀ ԱԺ պատգամավոր, «Հանրապետական» խմբակցության անդամ Գագիկ Մինասյանը:
Մեկնարկում է «Հայաստանի տարվա երիտասարդական մայրաքաղաք 2016» ծրագիրը: 2016 թվականին երիտասարդական մայրաքաղաք է հռչակվել Գյումրին: Կներկայացվեն բոլոր այն ծրագրերը, որոնք նախատեսված են այս տարի իրականացնել երիտասարդական մայրաքաղաք դարձած Գյումրիում: «Տարվա երիտասարդական մայրաքաղաք» ամենամյա մրցույթի հիմնական նպատակ է խթանել Հայաստանի Հանրապետության մարզերի համաչափ զարգացումը:
Այսօր կտրվի ևս մեկ ծրագրի մեկնարկ: «Ֆոնդ 100» բարեգործական հիմնադրամը ներկայացնում «Ֆոնդ 100» բարեսիրական նախագիծը: «Ֆոնդ 100» նախագծի նպատակն է միավորել բարեսիրտ ու հոգատար մարդկանց՝ կոչ անելով չլինել անտարբեր և միասնականության շնորհիվ իրականացնել զգալի ու անհրաժեշտ փոփոխություններ քաղցկեղով տառապող երեխաների, ինչպես նաև նրանց ընտանիքների կյանքում: Եթե յուրաքանչյուր ամիս 500.000 մարդ ֆոնդին ընդամենը 100 դրամ փոխանցի, ապա յուրաքանչյուրի 100 դրամը միավորելով հնարավոր կլինի փրկել ամսական 2 երեխայի կյանք, երջանկացնել առնվազն երկու հայ ընտանիքի: Լրագրողների հետ հանդիպմանը հիմնադրամի նախագահ Տիգրան Բալոյանը կներկայացնի նախագծի մանրամասները:
Անցկացվում է «Հայրերի հող» խորագրով կարճամետրաժ, ցածրաբյուջե ֆիլմերի մրցույթ: Այն անցկացվում է Համազգային հայ կրթական և մշակութային միության ու Երևանի թատրոնի և կինոյի պետական ինստիտուտի նախաձեռնությամբ: Մրցույթի ժյուրիի նախագահ, Հայաստանի ազգային կինոակադեմիայի նախագահ Հարություն Խաչատրյանը, «Համազգային» հիմնադրամի նախագահ Լիլիթ Գալստյանը և Երևանի թատրոնի և կինոյի պետական ինստիտուտի ռեկտոր Դավիթ Մուրադյանը կներկայացնեն մրցույթի մանրամասները։ Մրցույթը նվիրվում է Հայաստանի Հանրապետության անկախության 25 ամյակին:
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: