4 րոպեի ընթերցում
ԵՐԵՎԱՆ, 29 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալությունը Լրատվական ռադիոյի եթերում ներկայացնում է այն ամենն, ինչի մասին կկարդաք, կլսեք ու կտեսնեք այսօրվա լրահոսում:
Այսօր` մարտի 29-ին, ԱԺ-ում նախատեսված է Եվրանեսթ խորհրդարանական վեհաժողովում ՀՀ ԱԺ պատվիրակության անդամների մամուլի ասուլիսը: Պատվիրակության անդամները մանրամասներ կներկայացվեն վեհաժողովի հինգերորդ լիագումար նիստի աշխատանքների վերաբերյալ: Հիշեցնենք, որ վեհաժողովի նիստը տեղի է ունեցել Բրյուսելում: Նիստի աշխատանքները դեռ նոր էին սկսվել, երբ Բրյուսելում իրականացվեցին ահաբեկչական գործողություններ:
Կայանալու է Արդյունաբերողների և գործարարների միջազգային կոնգրեսի խորհրդի նախագահության նիստը։ Հայկական կողմից ելույթ են ունենալու ՀՀ փոխվարչապետ, Միջազգային տնտեսական ինտեգրացիայի և բարեփոխումների նախարար Վաչե Գաբրիելյանը, ՀՀ էկոնոմիկայի նախարար Արծվիկ Մինասյանը, Հայաստանի արդյունաբերողների և գործարարների միության նախագահ Արսեն Ղազարյանը և այլք։ Պատվիրակությանը նիստից առաջ ընդունելու է ՀՀ վարչապետ Հովիկ Աբրահամյանը։
«Զվարթնոց օդանավակայանի ապագան և Դոնի Ռոստովի ավիավթարի վարկածները» թեմայի շուրջ մասնագիտական դիտարկումներ է ներկայացնելու Հայաստանի Հանրային խորհրդի ավիացիայի ենթահանձնաժողովի նախագահ, «Ազգային ավիացիոն միավորում» ՀԿ նախագահ Դմիտրի Ադբաշյանը։ Հիշեցնենք, «Boeing 737-800» ինքնաթիռը կործանվել է Ռոստովի օդանավակայանում, երբ փորձել է երկրորդ անգամ վայրէջք կատարել։ Ինքնաթիռը բախվել է գետնին թռիչքուղու սկզբնամասում և կիսվել երկու մասի։ Ինքնաթիռի բոլոր ուղևորները մահացել են։
Ավտովարորդների խնդիրները կրկին օրակարգում են: ««Աքիլես» ավտովարորդների իրավունքների պաշտպանության կենտրոն» ՀԿ նախագահ Էդուարդ Հովհաննիսյանը կրկին խոսելու է ճանապարհային երթեւեկության խախտումների համար սահմանված տուգանքներից, դրանց վերանայումից և նախատեսված պատասխանատվությունից:
«Մուսա լեռան 40 օրը» գիրքը հրատարակվել է հունգարերեն թարգմանությամբ: 2015թ. ապրիլին Հայոց ցեղասպանության 100-րդ տարելիցի միջոցառումների շրջանակում հունգարահայ համայնքի կողմից հունգարերեն թարգմանությամբ վերահրատարակվեց Ֆրանց Վերֆելի «Մուսա լեռան 40 օրը» վեպը: Այսօր այն կներկայացվի հայ հասարակությանը: Վեպն առաջին անգամ հրատարկվել է 1933թ. և մեկ տարի անց արժանացել «Տարվա լավագույն վեպ» միջազգային միցանակին: Այն լույս է տեսել մոտ մեկ միլիոն օրինակով և թարգմանվել աշխարհի 36 լեզուներով:
«Երուսաղեմի ռուսական և հայկական սրբավայրերը» խորագրով լուսանկարների ցուցահանդեսը` ՀՀ քաղաքաշինության նախարարության Ճարտարապետության ազգային թանգարան-ինստիտուտում: Ցուցահանդեսին ներկայացվում են ցուցանմուշներ Սանկտ-Պետերբուրգի խոշորագույն թանգարաններից մեկի՝ Կրոնների պատմության պետական թանգարանի հավաքածուից: Այցելուները հնարավորություն կունենան տեսնելու Պաղեստինի կայսերական ուղղափառ ընկերության հավաքածուի 60-ից ավելի լուսանկարներ:
Կրկին ցուցահանդես, բայց այս անգամ Երևանի պատմության թանգարանում: Կբացվի «Մշակույթների երկխոսություն» խորագրով ցուցահանդեսը: Ցուցահանդեսի շրջանակում կներկայացվեն Երևանի պատմության թանգարանի իրանական հավաքածուի ցուցանմուշները:
Արամ Խաչատրյանի տուն-թանգարանում Հայաստանի և Ռուսաստանի վաստակավոր արտիստ, դաշնակահար Մարիա Ղամբարյանի ծննդյան 90-ամյակին նվիրված միջոցառումների շրջանակում կկայանա հոբելյանական մենահամերգ։ Անվանի դաշնակահարը կկատարի Կոմիտասի, Պագանինիի, Բեթհովենի, Բախի, Շուբերտի, Լիստի, Շոպենի, Ռավելի ստեղծագործությունները։
Այս և այլ թեմաների մասին կարող եք մանրամասն ընթերցել armenpress.am կայք էջում և լսել լրատվական ռադիոյի եթերում: Հետևեք մեզ թվիթերում և ֆեյսբուքում: