398.27
ՀՀ-ն և Հունաստանը փոխանակվելու են զինամթերքի արտադրության տեխնոլոգիաներով
1 րոպեի ընթերցում
ԵՐԵՎԱՆ, 9 ՓԵՏՐՎԱՐԻ, ԱՐՄԵՆՊՐԵՍ: Հայաստանի և Հունաստանի կառավարությունների միջև կնքվելու է ռազմատեխնիկական համագործակցության համաձայնագիր: Ինչպես հաղորդում է «Արմենպրես»-ը` համաձայնագրին հավանություն տալու մասին հարցն ընդգրկված է ՀՀ կառավարության փետրվարի 11-ի նիստի օրակարգում:
Կողմերի միջև համագործակցությունը կներառի մի քանի ոլորտ: Մասնավորապես, նախատեսվում է զենքի, զինամթերքի և պայթուցիկների արտադրության նպատակով տեխնոլոգիաների փոխանցում և տեխնիկական աջակցություն,զենքի արտադրության վերաբերյալ տեղեկատվության, փորձի և կարծիքների փոխանակում,ռազմական նշանակության արտադրանքի վերաբերյալ, դրա արտադրության համար հետազոտությունների իրականացում և զարգացում: Համաձայնագրի ներքո համատեղ ստեղծված աշխատանքի արդյունքների և սարքավորումների վաճառքը,սարքավորումների հասանելիության հարցը երրորդ պետություններին կարգավորվում է առանձին համաձայնագրերով` երկու երկրների համաձայնությամբ:
Համաձայնագրով նախատեսված դրույթների իրականացման նպատակով կողմերը ստեղծելու են հայ-հունական ռազմատեխնիկական համագործակցության միջգերատեսչական հանձնաժողով:
Բաժանորդագրվեք մեր ալիքին Telegram-ում