396.76
Բաքվի համար օրինաչափություն է` նախագահների հանդիպումից առաջ սահմանում սրել իրավիճակը. Լարիսա Ալավերդյան
3 րոպեի ընթերցում
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Պաշտոնական Բաքվի համար օրինաչափություն է դարձել Հայաստանի ու Ադրբեջանի նախագահների հանդիպումից առաջ սահմանում իրավիճակը սրելը: «Արմենպրես»-ի հետ զրույցում նման կարծիք հայտնեց «Ընդդեմ իրավական կամայականությունների» հասարակական կազմակերպության գործադիր տնօրեն, Հայաստանի մարդու իրավունքների առաջին պաշտպան Լարիսա Ալավերդյանը: Նրա խոսքով, Ադրբեջանը, ինչպես միշտ, նախագահների հանդիպումներից առաջ փորձում է իր դիրքերն «ուժեղացնել»: Դրանից բացի, ցույց է տալիս իր դժգոհությունը ԵԱՀԿ Մինսկի խմբի ձևաչափի վերաբերյալ:
«Ադրբեջանում շատ լավ պատկերացնում են, որ աշխարհաքաղաքական այս իրավիճակում խոշոր խաղացողները թույլ չեն տա խնդիրը լուծել ուժային մեթոդով: Ինչպես նաև Ադրբեջանը տեսնում է, որ տարածքները վերադարձնելու, այսպես կոչված, իր իրավունքի մասին տարածած տեսակետը դրական արձագանք չի ստանում այն երկրներում որոնք ներկայացված են ԵԱՀԿ Մինսկի խմբում: Դա նշանակում է Ադրբեջանը մի հնարավորություն ունի, տարբեր ժամանակներում ավելացնել սադրիչ գործողությունների թիվը»,-ասաց Լարիսա Ալավեդյանը: Նա ընդգծեց, որ Ադրբեջանը նման քայլերի է դիմում ոչ միայն երկու երկրների նախագահների հանդիպումից առաջ, դա կարող է լինել և արտգործնախարարների հանդիպումից առաջ, ինչպես նաև այլ դեպքերում: Ադրբեջանը, որպես կանոն, գնում է բռնության, էսկալացիայի ճանապարհով:
«Ցավոք, դա դեռ տևելու է երկար ժամանակ: Մինչև վերջնական չհստակեցվի այն, որ Ադրբեջանը ոչ մի իշխանություն չի ունեցել Լեռնային Ղարաբաղի Հանրապետության վրա: Դա է խնդիրը»,-ավելացրեց Լարիսա Ալավերդյանը:
Ինչ վերաբերում է հայկական դիվանագիտության գործողություններին, ապա Լարիսա Ալավերդյանը նշեց, որ հայկական դիվանագիտություն ասելով չպետք է պատկերացնել միայն գործադիր մարմինը: Շատ կարևոր է նաև թե խորհրդարանական, թե ժողովրդական դիվանագիտությունը: Ըստ Լարիսա Ալավերդյանի` այն գաղափարները, որոնք դժվար են գործադիր մարմնի համար շրջանառության մեջ դնելը, ավելի հասու են պառլամենտական դիվանագիտությանը: Հետևաբար պետք է աշխատել բոլոր օղակներով` Արցախի շուրջ ստեղծված իրավիճակը միջազգային հարթակում քաղաքական օրակարգի հարց դաձնելու համար:
Բաժանորդագրվեք մեր ալիքին Telegram-ում