388.33
De Beers տունը կառաջարկի ադամանդն ընտրել ըստ ճաշակի
1 րոպեի ընթերցում
ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: De Beers մակնիշի կրպակը դեկտեմբերի 1-ին Պետական հանրախանութում բացում Է ադամանդների ցուցահանդես-վաճառք, որը կտեւի մինչեւ տարեվերջ: Գնորդներին հասանելի կլինի Beauty Scan ծառայությունը, հաղորդում Է «Արմենպրես»-ը՝ հղում անելով մամուլի տեղեկագրին:
Պոտենցիալ հաճախորդների ուշադրությանն են առաջարկվելու մատանիների հինգ հիթային մոդելներ: Դրանց թվում են «արքայադուստր» քառակուսի երեսակման 2,5-կարատանոց դեղին ադամանդը, «կուշոն» երեսակման դեղին ադամանդը կամ «բարձիկը», եզրաշերտով ագուցված կլոր երեսակման վարդագույն ադամանդը, որը զարդարված Է մանր ադամանդներով, կլոր դեղին ադամանդը՝ երկու եռանկյունի անգույն քարերով, եւ 2,03-կարատանոց կլոր անգույն ադամանդը՝ փայլեցված սպիտակ ոսկուց պատրաստված կարճ շրջանակով:
De Beers ընկերությունը հիմնադրվել Է 1888 թվականին: 1939 թվականին մշակել Է ադամանդների 4Cs (carat, cut, clarity & colour, կամ «կարատը, երեսակումը, մաքրությունը եւ գույնը») դասակարգումը: 1947 թվականին ընդունվել Է բրենդի A Diamond is Forever («Ադամանդ՝ ընդմիշտ») կարգախոսը: 2001 թվականին ընկերությունը միավորվել Է LVMH կոնցեռնի հետ:
