«Շանթ 2015» զորավարժությունները շարունակվում են.Ավանում կխաղարկվի պարետային ժամ հայտարարելու սցենար
2 րոպեի ընթերցում
ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում «Շանթ 2015» հրամանատարաշտաբային զորավարժության շրջանակում խաղարկվել է սցենար, ըստ որի` երկրում կապի եւ տեղակատվական համակարգի ղեկավարման որոշ գործառույթներ արդեն փոխանցվել են ՀՀ զինված ուժերին: «Արմենպրես»-ի փոխանցմամբ, նման տեղեկատվություն հաղորդեց ՀՀ ՊՆ մամուլի խոսնակ Արծրուն Հովհաննիսյանը ՊՆ վարչական համալիրում զորավարժությունը լուսաբանող լրագրողների հետ հանդիպմանը:
«Զորավարժության շրջանակում խաղարկվող սցենարի համաձայն` Ազգային պատկերասրահից ու Մատենադարանից արդեն արժեքավոր գործերը տարհանվել են եւ գտնվում են ապահով վայրերում, Երեւանի Էրեբունի բժշկական կենտրոնում 100 եւ Արտաշատի հիվանդանոցում 50 մահճակալ է տեղադրվել՝ պայմանական վիրավորներին ընդունելու համար»,- ասաց Արծրուն Հովհաննիսյանը:
Երեկոյան Հանրապետության հրապարակը կհայտնվի իրադարձությունների կիզակետում. կձեւավորվի մոտ 30 ավտոբուսներից կազմված շարասյուն՝ բնակիչների պայմանական տարհանումը կազմակերպելու նպատակով: Իսկ Ավան վարչական շրջանում կխաղարկվի պայմանական պարետային ժամ ՝ գիշերը 2-ից մինչև առավոտյան 7-ը:
Հայաստանում մեկնարկել են «Շանթ 2015» ռազմավարական հրամանատարաշտաբային զորավարժությունները: Համապետական նշանակության «Շանթ-2015» զորավարժությունը պլանային բնույթի է և նպատակաուղղված է պաշտպանությանը պետության անմիջական նախապատրաստության և ագրեսիայի հետմղման ընթացքում պետական և ռազմական կառավարման մարմինների զորահավաքային նախապատրաստության, պատրաստականության բարձր աստիճանների բերման ունակության վերստուգմանը, փոխգործակցության և գործողությունների ներդաշնակության մակարդակի բարձրացմանը: Հաշվի առնելով Հայաստանի շուրջ և մերձատարածքում ստեղծված ռազմաքաղաքական իրադրությունը, զորավարժության սցենարում առկա մտացածին հակառակորդը և իրավիճակը առավելապես համապատասխանեցված են իրականությանը: