1 րոպեի ընթերցում
ԵՐԵՎԱՆ, 6 ՀՈՒԼԻՍԻ, ԱՐՄԵՆՊՐԵՍ: Հայաշատ Հալեպում արդեն մի քանի օր է էլեկտրականությունն ու ջրամատակարարումը դադարեցված է: Այս մասին «Արմենպրես»-ին տեղեկացրեց Հալեպի մեր աղբյուրը` ավելացնելով, որ բնակիչները շշերով փորձում են ապահովել խմելու ջուրը:
Ինչ վերաբերում է քաղաքում տիրող իրավիճակին, աղբյուրը տեղեկացրեց, որ թեպետ մերթ ընդ մերթ պայթյունների, կրակոցների ձայներ լսվում են, այնուամենայնիվ, թեժ բախումներ և մարտեր չկան, իրավիճակը բավական հանգիստ կարելի է համարել:
«Հալեպցիներն այժմ մտահոգված են ջրի և էլեկտրականության բացակայությամբ»,- նշեց աղբյուրը:
Լուրեր են շրջանառվում այն մասին, որ պետությունն աշխատանքներ է տանում դրանք վերականգնելու ուղղությամբ:
Հալեպ քաղաքը 2012թ. ամռանից ի վեր հայտնվել է կառավարական ուժերի և զինված տասնյակ խմբավորումների բախումների թիրախում: Բախումներն այնտեղ մինչև օրս շարունակվում են: Քաղաքի արևմտյան թաղամասերը գտնվում են կառավարական ուժերի, իսկ արևելյան թաղամասերը` զինված խմբավորումների հսկողության տակ: