2 րոպեի ընթերցում
ԵՐԵՎԱՆ, 18 ՄԱՅԻՍԻ, ԱՐՄԵՆՊՐԵՍ: Հայաստանում որդեգրման գործընթացի թերի լինելը շարունակում է արդիական մնալ, ինչը կարող է երեխաների վաճառքի և ապօրինի որդեգրման պատճառ լինել: Այս մասին մայիսի 18-ին լրագրողների հետ հանդիպմանը նշեց Միավորված ազգերի կազմակերպության հատուկ զեկուցող Մոդ դե Բյոր-Բուքիքիոն, ով մայիսի 12-18-ի այցի ընթացքում գնահատել է Հայաստանում երեխաների վաճառքին, մարմնավաճառությանը և պոռնկագրությանն առնչվող իրավիճակը:
«Ես ողջունում եմ Հայաստանի կառավարության և Ազգային ժողովի որոշումն՝ օրենսդրական փոփոխությունների մեկնարկի առնչությամբ, և կոչ եմ անում առանց հապաղման համապատասխանեցնել երեխաների որդեգրմանը վերաբերող օրենսդրությունը համաշխարհային նորմերին և ստանդարտներին՝ ներառյալ Հաագայի կոնվենցիային», - ընդգծեց Մոդ դե Բյոր-Բուքիքիոն:
Միավորված ազգերի կազմակերպության հատուկ զեկուցողը հավելեց, որ որդեգրման ընթացքը պետք է բխի առաջին հերթին երեխայի շահերից, և ողջունեց Հայաստանի կառավարության 2010թ.-ից ի վեր կատարվող աշխատանքները՝ երկրի ներսում որդեգրումների քանակությունը նվազեցնելու, ինչպես նաև այլընտրանքային խնամքի ինստիտուտի կայացմանը և ընտանիքներին սատարելու ուղղությամբ:
Հայաստանում իր յոթօրյա առաքելության ընթացքում մարդու իրավունքների փորձագետ Մոդ դե Բյոր-Բուքիքիոնը հանդիպել է գործադիր, օրենսդիր և դատական իշխանության ներկայացուցիչների հետ՝ ազգային և տեղական մակարդակներով: Նա նաև հանդիպել է երեխաների պաշտպանության հարցերով զբաղվող քաղաքացիական հասարակության անդամների և ՀԿ-ների հետ, ինչպես նաև այցելել երեխաների խնամքի կենտրոններ և ապաստարաններ Երևանում, Վանաձորում և Գյումրիում: