ՊՐԱՀԱ, 9 ՄԱՅԻՍԻ, ԱՐՄԵՆՊՐԵՍ: Երկրորդ աշխարհամարտի ավարտի 70-ամյակի կապակցությամբ՝ Չեխիայում ՀՀ դեսպան Տիգրան Սեյրանյանն այցելել է Վիսոչինա երկրամասի Սազավա ավանի ազատագրման համար հերոսաբար զոհված 19-ամյա սյունեցի Արշավիր Դավթյանի շիրիմին: Ինչպես հաղորդում է «Արմենպրես»-ը, այս մասին հայտնում է Պրահայում Հայաստանի դեսպանությունը՝ Ֆեյսբուքի իր պաշտոնական էջի միջոցով:
«Ուրարտու» հայ-չեխական միության ներկայացուցիչները` Ալեքսանդր Սարգսյանի ղեկավարությամբ, մայիսի 8-ին կազմակերպված տոնական հուշ ձեռնարկին Հայաստանի և Չեխիայի դրոշների ներքո Ա.Դավթյանի շիրմաքարին և զոհված չեխ զինվորների հուշարձանին դրել են ծաղկեպասակներ և ծաղիկներ: Ավանի փողային նվագախումբը կատարել է հաղթական քայլերգ: Հուշարձանի մոտ պատվո պահակախումբ էր կանգնել Սազավայի հրշեջ ծառայության անձնակազմը:
Միջոցառմանը Հայաստանից ժամանել էին հայ հերոսի ազգականները:
Արշավիր Դավթյանի շիրմաքարը պատրաստվել է և Սազավայի կենտրոնում տեղադրվել Բոհուսլավ Տրդլայի ջանքերով: Բնակավայրի ղեկավարությունը և բնակիչները հիացմունքի արժանի խնամքով են պահում այն:
Ձեռնարկի ավարտին «Ուրարտու» միության կողմից կազմակերպվել էր հյուրասիրություն հայակական ավանդական խորովածով, գաթայով, գինիներով և կոնյակով:Բարեկամական ջերմ մթնոլորտում անցած ձեռնարկին մասնակցեցին Սազավայի բազմաթիվ բնակիչներ, Վիսոչինայի և Բռնոյի հայ համայնքների ներկայացուցիչներ: