«Հայ դատ»-ը Ավստրալիայի կառավարությունից պահանջում է զսպվածության կոչ անել Ադրբեջանին
1 րոպեի ընթերցում
ԵՐԵՎԱՆ, 5 ՕԳՈՍՏՈՍԻ, ԱՐՄԵՆՊՐԵՍ: «Հայ դատ»-ի Ավստրալիայի հանձնախումբը այդ երկրի կառավարությունից պահանջել է Ադրբեջանին դիմել զսպվածության կոչով: Ինչպես հաղորդում է «Արմենպրես»-ը, Ավստրալիայի արտգործնախարար Ջուլի Բիշոփին հղած նամակում Հայ դատի Ավստրալիայի հանձնախմբի գործադիր տնօրեն Վաչե Ղահրամանյանը կոչ է անում առանձին հայտարարությամբ ստիպել Ադրբեջանին նվազեցնել թշնամանքը շփման գծում` արագորեն վերջ տալ բռնություններին և մարդկային անիմաստ կորուստներին:
«Ադրբեջանը պետք է շարունակական երկխոսության մեջ մտնի ԵԱՀԿ-ի, Հայաստանի և Լեռնային Ղարաբաղի իշխանությունների հետ` ապահովելու այս հակամարտության խաղաղ կարգավորումը»,- ասվում է նամակում:
Նշվում է, որ ՄԱԿ-ի գլխավոր քարտուղարը, ԵԱՀԿ-ն, ԱՄՆ պետքարտուղարությունը և Ռուսաստանի Դաշնության արտգործնախարարությունն իրենց մտահոգությունն են հայտնել սահմանային միջադեպերի և բռնությունների ավելացման կապակցությամբ: