Քեսաբի Կաթողիկե եկեղեցուց կողոպտված աղոթագրքերը վաճառքի են հանվել

ԵՐԵՎԱՆ, 14 ՀՈՒՆԻՍԻ, ԱՐՄԵՆՊՐԵՍ: Սիրիայի հայաբնակ Քեսաբ բնակավայրի վրա Թուրքիայի կողմից զինյալների ներխուժումից հետո Հայ կաթողիկե եկեղեցուն պատկանող առևանգված հնատիպ գրքերը վաճառքի են հանվել Լաթաքիայում: Ինչպես հաղորդում է «Արմենպրես»-ը` վկայակոչելով Asbarez.com-ը, վաճառվող գրքերի շարքում են հնատիպ աղոթագրքեր, Ճաշոցի, Սուրբ Ավետարանի և Մաշտոցի ութ օրինակները:

Հայր Նարեկ Լուիզյանին հաջողվել է գնել հոգևոր մատյանները դրանք վաճառքի դրած «վաճառականից»:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումը սկսվել է մարտի 21-ին Թուրքիայի սահմանի մի քանի կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքից բնակիչների մեծ մասը տեղափոխվել է առավել ապահով վայրեր, հիմնականում Լաթաքիա, իսկ որոշ ընտանիքներ, այդ թվում` մեծահասակներ, մնացել են իրենց տներում, հետո գերի վերցվել զինյալների կողմից: Նրանց մեծամասնությանը տարել են Թուրքիայի Վաքըֆհայաբնակգյուղ: Այստեղից էլ հայերն ուղարկվել են Բեյրութ: