«Զվարթնոց»-ում նախորդ տարվա մարտի համեմատ ուղևորահոսքն աճել է 19 տոկոսով
1 րոպեի ընթերցում
![«Զվարթնոց»-ում նախորդ տարվա մարտի համեմատ ուղևորահոսքն աճել է 19 տոկոսով](http://armenpress.am/resized/480/static/news/b/2014/04/756826.jpg)
ԵՐԵՎԱՆ, 4 ԱՊՐԻԼԻ, ԱՐՄԵՆՊՐԵՍ: Օդային փոխադրումների ոլորտում վերջին վեց ամիսներին արձանագրվել է ուղևորների և չվերթերի թվի կանոնավոր աճ, ինչը ՀՀ կառավարության կողմից հայտարարված «Բաց երկնքի» քաղաքականության արդյունք է: Ինչպես «Արմենպրես»-ին տեղեկացրին «Արմենիա միջազգային օդանավակայաններ» ՓԲԸ-ից, 2014թ. մարտին 2013թ. նույն ժամանակահատվածի համեմատ «Զվարթնոց»-ում ուղևորահոսքն ավելացել է 19 տոկոսով: Եթե 2013թ. փետրվարին «Զվարթնոց» միջազգային օդանավակայանի ծառայություններից օգտվել է 102 295 ուղևոր, ապա 2014թ. մարտի ցուցանիշը կազմում է 122 056 ուղևոր:
Չվերթերի աճն այդ ժամանակահատվածում կազմել է 17 տոկոս: 2014թ. մարտին կատարվել է 1517 չվերթ` նախորդ տարվա նույն ժամանակահատվածի 1295 չվերթի համեմատ: Եթե 2013թ. մարտին դեպի «Զվարթնոց» կանոնավոր չվերթեր իրականացնում էին 27 ավիաընկերություններ, ապա այժմ դրանց թիվը 33 է: Բացի այդ, ավիաընկերություններից շատերն ավելացրել են իրենց հաճախականությունները բոլոր ուղղություններով, ինչը հանգեցրել է ավիատոմսերի գնի նվազմանը: