«Բաց դռներ» ծրագրի շրջանակներում ԱԺ-ում հյուրընկալվել են Արարատ գյուղի աշակերտները

ԵՐԵՎԱՆ, 25 ՓԵՏՐՎԱՐԻ, ԱՐՄԵՆՊՐԵՍ: «Բաց դռներ» ծրագրի շրջանակներում Ազգային ժողովը փետրվարի 25-ին հյուրընկալել է Արարատի մարզի Արարատ գյուղի Վազգեն Սարգսյանի անվան համար 1 դպրոցի մի խումբ աշակերտների եւ ուսուցիչների: Ինչպես «Արմենպրես»-ին տեղեկացրին ՀՀ ԱԺ հասարակայնության եւ տեղեկատվության միջոցների հետ կապերի վարչությունից, հյուրերը ներկա են գտնվել քառօրյա նիստերին, ապա հանդիպել ԱԺ գիտության, կրթության, երիտասարդության եւ սպորտի մշտական հանձնաժողովի նախագահ Արտակ Դավթյանի հետ: Պարոն Դավթյանն աշակերտներին ներկայացրել է խորհրդարանի կառուցվածքը, օրենսդրական գործունեությունը, մշտական հանձնաժողովների աշխատանքը եւ պատասխանել աշակերտներին հետաքրքրող հարցերին: Աշակերտների եւ ուսուցիչների հարցերը վերաբերել են Բոլոնիայի գործընթացին, տասներկուամյա կրթությանը, հանրակրթության երեք մակարդակներին, ընդունելության քննություններին:

Այցի ավարտին աշակերտները ԱԺ նիստերի դահլիճում լուսանկարվել են Աժ նախագահ Հովիկ Աբրահամյանի հետ: