1 րոպեի ընթերցում
ԵՐԵՎԱՆ, 19 ԴԵԿՏԵՄԲԵՐԻ, ԱՐՄԵՆՊՐԵՍ: Սևանա լճում տարեկան ձկնարտադրությունը Հայաստանի կառավարությունը նախատեսում է հասցնել 50 հազար տոննայի, որը կկազմի 150 միլիարդ դրամ: Այդ նպատակով ՀՀ կառավարությունն, այսօրվա նիստում հաստատված ծրագրի համաձայն, կստեղծիՍևանա լճում իշխանի պաշարների վերականգնման և ձկնաբուծության զարգացման հիմնադրամ:
«Ծրագիրը վերաբերում է Սևանա լճում էնդեմիկ ձկնաբուծության զարգացմանը: Ծրագիրը կրելու է երկարատև բնույթ, որով նախատեսվում է Սևանա լճում ձկնաբուծության արտադրանքը հասցնել տարեկան 50 հազար տոննայի, որը կազմում է մոտ 150 միլիարդ դրամ»,-«Արմենպրես»-ի հաղորդմամբ, կառավարության նիստում նշեց ՀՀ էկոնոմիկայի նախարար Վահրամ Ավանեսյանը:
ՀՀ վարչապետ Տիգրան Սարգսյանն իր հերթին անհրաժեշտ համարեց լայնորեն լուսաբանել տվյալ ծևագիրը: «Ենթադրվում է, որ պետություն-մասնավոր համագործակցության հիման վրա է իրականացվելու այս ծրագիրը, և ԶԼՄ-ներով լուսաբանելը նպատակ ունի բիզնեսի ուշադրությունը հրավիրել այս ծրագրի վրա, որպեսզի վերջինս ուղղակիորեն ներդրումներ կատարի և դառնա համագործակցող կողմ»,- ավելացրեց վարչապետը:
Ծրագրով նախատեսվում է ստեղծել 3-5 հազար աշխատատեղ: