2 րոպեի ընթերցում
ԵՐԵՎԱՆ, 5 ԴԵԿՏԵՄԲԵՐԻ, ԱՐՄԵՆՊՐԵՍ: ԼՂՀ Ազգային ժողովի նախագահ Աշոտ Ղուլյանը Միացյալ Նահանգների Կոնգրեսում դեկտեմբերի 4-ին առանձին հանդիպումներ է ունեցել Կոնգրեսի անդամներ Ադամ Շիֆի և Աննա Էշուի հետ: Ինչպես «Արմենպրես»-ին տեղեկացրին ԼՂՀ ԱԺ մամուլի ծառայությունից, Արցախի խորհրդարանի նախագահը շնորհակալություն է հայտնել կոնգրեսականներին՝ ակտիվ արցախանպաստ գործունեության համար, ապա հակիրճ ներկայացրել երկրում և տարածաշրջանում ընթացող զարգացումները:
Զրուցակիցներն անդրադարձել են նաև Միացյալ Նահանգների և Արցախի միջև հարաբերությունների ընդլայնման հեռանկարներին և այդ համատեքստում կարևորել քաղաքական, տնտեսական և մարդասիրական կապերի աշխուժացումը:
Այնուհետև Արցախի խորհրդարանի նախագահն այցելել է «Ամերիկայի ձայն» լրատվական գործակալություն և հարցազրույց տվել նույն կառույցի հայկական ծառայությանը:
Օրվա երկրորդ կեսին ԱՄՆ-ում ՀՀ դեսպանատանը կայացել է ընդունելություն՝ ի պատիվ ԼՂՀ ԱԺ նախագահի, որին հրավիրված են եղել Վաշինգտոնում գործող դիվանագիտական, հանրային և համայնքային կազմակերպությունների ներկայացուցիչներ: Ընդունելության մասնակիցներին ողջույնի խոսքով դիմել են Միացյալ նահանգներում Հայասատանի Հանրապետության դեսպան Թաթուլ Մարգարյանը և ԼՂՀ ԱԺ նախագահ Աշոտ Ղուլյանը:
Միջոցառման ընթացքում ՀՀ և ԼՂՀ պետական պարգևներ են հանձնվել ամերիկահայ մի շարք հասարակական գործիչների՝ համազգային խնդիրների լուծման գործում նրանց ունեցած ավանդի համար: