1 րոպեի ընթերցում
ԵՐԵՎԱՆ, 21 ՆՈՅԵՄԲԵՐԻ, ԱՐՄԵՆՊՐԵՍ: Դամասկոսի մերձակայքում գտնվող Հարասթա շրջանում նոյեմբերի 18-ին հայ զինծառայող է զոհվել: Այս մասին «Արմենպրես»-ը տեղեկացավ «Բերիո լուրեր» ֆեյսբուքյան էջից: Զոհվածը Հակոբ Տեր Ղազարյանն է, ում ինքնությունը պարզվել է միայն երեք օրվա որոնումների արդյունքում: Հարասթա շրջանում գտնվող զինվորական կարևոր կենտրոններից մեկը, որտեղ գտնվում էին սիրիական բանակի զինվորական հրասայլերը վերանորոգելու երկու արտադրամասերը, նոյեմբերի 18-ին ընդդիմադիրների ռմբակոծության թիրախ էր դարձել: Տեղի ունեցած պայթյունի հետևանքով կենտրոնի երկու շենքերն ամբողջությամբ փլվել էին` տասնյակ զոհերի ու վիրավորների պատճառ դառնալով: Զոհերից ոմանց ինքնությունը դժվար էր պարզել միանգամից, քանի որ դիակները մասնատվել էին, ուստի երեք օր տևած հետազոտություններից հետո է միայն պարզ դարձել, որ զոհերի թվում է նաև սիրիական բանակի զինծառայող Հակոբ Տեր-Ղազարյանը:
Հակոբ Տեր Ղազարյանը ծնվել է 1988թ.-ի սեպտեմբերի 14-ին, Հալեպում:
Վիճակագրական տվյալների համաձայն՝ 2.5 տարի շարունակվող բախումների հետևանքով, մինչև 2013թ.-ի նոյեմբերի 14-ը, Սիրիայում զոհվել էր 65 հայ: Իսկ ընդհանուր զոհերի թիվը գերազանցել է 120 հազարը: