Մի քանի երկրներից ներկրվող որոշ ապրանքատեսակներ աղիքային ցուպիկի փորձարկում կանցնեն

ԵՐԵՎԱՆ, 14 ՕԳՈՍՏՈՍԻ, ԱՐՄԵՆՊՐԵՍ։ Հայաստանի գյուղատնտեսության նախարարության սննդամթերքի անվտանգության պետական ծառայության պետը ծառայության աշխատակազմի սահմանային հսկիչ կետերին գրավոր հանձնարարել է Բրազիլիայից՝ սառեցված եւ պահածոյացված միս, այդ թվում՝ թռչնամիս, Բելառուսից՝ ապխտած միս եւ կաթնաշոռ, Նիդեռլանդներից՝ պանիր, ԱՄՆ-ից՝ թռչնամիս եւ ձուկ, Նոր Զելանդիայից՝ ոչխարի միս Հայաստանի տարածք ներմուծելու ժամանակ կատարել նմուշառում՝ լաբորատոր փորձարկումներով տվյալ բեռի անվտանգությունը որոշելու համար: «Արմենպրես»-ի հաղորդմամբ՝ Սննդամթերքի անվտանգության պետական ծառայությանից հայտնում են, որ որոշման համար հիմք է ընդունվել 2013թ. օգոստոսի 10-ին լրատվամիջոցներում առկա հրապարակումները նշված ապրանքատեսակներում աղիքային ցուպիկի և սալմոնելայի հարուցչի առկայության մասին։ Հանձնարարականի համաձայն՝ անկախ ներմուծվող սննդամթերքի ռիսկայնությունը որոշող չափանիշների հիման վրա գնահատման արդյունքից և ուղեկցող փաստաթղթերի առկայությունից, պետք է կատարվի նմուշառում՝ լաբորատոր փորձարկումներով տվյալ բեռի անվտանգությունը որոշելու համար:

Համաձայն ՀՀ օրենսդրության` ներկրվող բեռն ուղեկցող փաստաթղթերի` ՀՀ օրենսդրության պահանջներին համապատասխանության դեպքում չի ենթարկվում լաբորատոր փորձաքննության: