«Մանկական բեսթսելլեր» 8. «Իմ առաջին գիրքը» փոքրիկ հանրագիտարանը այս շաբաթվա առաջատարն է
5 րոպեի ընթերցում
ԵՐԵՎԱՆ, 13 ՕԳՈՍՏՈՍԻ, ԱՐՄԵՆՊՐԵՍ: Երևանյան գրախանութներում մանկական ստեղծագործությունների վաճառքը շարունակում է պասիվ լինել: Գրախանութների մենեջերները նշում են, որ հանգստի սեզոնը նպաստում է ոչ թե մանկական ու գեղարվեստական, այլ հիմնականում գիտահանրամատչելի գրականության ու հանրագիտարանների վաճառքին:
«Արմենպրես» լրատվական գործակալության «Մանկական բեսթսելլեր» նախագիծը շարունակում է ներկայացնել երևանյան գրախանութներում ամենաշատ վաճառված գրքերի ցանկը: Օգոստոսի երկրորդ շաբաթվա ընթացքում ամենաշատ վաճառված մանկական ստեղծագործությունը «Արևիկ» հրատարակչության «Իմ առաջին գիրքը» փոքրիկ հանրագիտարանն է: Գրքի տարբեր հատորները երեխաներին ծանոթացնում են ընտանի ու վայրի կենդանիների, թվերի ու տառերի, մրգերի ու բանջարեղենների, մարմնի մասերի և այլ պատկերների հետ: Այն արդեն մի քանի շաբաթ պարբերաբար ընդգրկված է վարկանիշային աղյուսակում:
Երկրորդ հորիզոնականում հայ մեծանուն գրող Հովհաննես Թումանյանի՝ «Արևիկ» հրատարակչության «Հեքիաթներ»-ն են: Թումանյանի լեզուն և մտածողությունը պարզ են, ժողովրդական: Նա խորությամբ է արտացոլել հայ ժողովրդի հոգեբանությունը, մտքերն ու ձգտումները: Թումանյանին հաջորդում է դանիացի գրող Հանս Քրիստիան Անդերսենի «Հեքիաթներ»-ը: Սրանց զգալի մասն էկրանավորվել է ու հայտնի է փոքրիկներին: «Հայ ժողովրդական հեքիաթներ»-ն այս շաբաթ չորրորդ հորիզոնականում են, դրանց հաջորդում է Շառլ Պերրոյի` «Բուկինիստ» հրատարակչության հրատարակած «Մոխրոտիկը» տիկնիկ գրքույկը: Այն պարբերաբար ընդգրկվել է վարկանիշային աղյուսակում:
«ՋիԷսԷմ» հրատարակչության «Խոսող այբուբենը» մանկական գիրքը, որն առաջին անգամ է ներառված «Մանկական բեսթսելլեր»-ի ցանկում, զբաղեցնում է վեցերորդ հորիզոնականը: Այն նախատեսված է նախադպրոցական տարիքի երեխաների համար, որոնց ձայնային ազդանշաններով սովորեցնում է հայերենի այբուբենը:
Հովհաննես Թումանյանի` «ՋիԷսԷմ» հրատարակչության հրատարակած «Շունն ու կատուն» նույնպես առաջին անգամ է ընդգրկված վարկանիշային աղյուսակում: Այն փոքրիկների կողմից սիրված ամենահայտնի հեքիաթներից է և ունի նաև էկրանավորված մի քանի տարբերակներ: Հեքիաթը ցանկի վեցերորդ հորիզոնականում է: Յոթերորդում այս շաբաթ գերմանացի մանկագիր և հեքիաթագիր Գրիմ Եղբայրների «Հեքիաթներ»-ն են: Սրանք հաճախակի ընդգրկվում են «Մանկական բեսթսելլեր»-ում և սիրված են նախադպրոցական և դպրոցական տարիքի երեխաների կողմից:
«Երեք խոզուկները»-ը, որը մի քանի անգամ եղել է «Արմենպրես» լրատվական գործակալության ներկայացրած ամենաշատ վաճառված գրքերի ցանկում, այս շաբաթ զբաղեցնում է իններորդ հորիզոնականը: Վարկանիշային աղյուսակը եզրափակում է Լուիսա Մեյ Էլքոթի` «Զանգակ» հրատարակչության «Փոքրիկ տիկիններ» գիրքը:
Հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուկինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը:
| Տեղ | Փոփ. | Գիրք | Հրատ. | Քանակ | |
| 1 | 0 | Իմ առաջին գիրքը | Արևիկ | 23 | |
| 2 | +2 |
Հովհաննես Թումանյան «Հեքիաթներ» |
Արևիկ | 18 | |
| 3 | +3 | Հանս Քրիստիան Անդերսեն «Հեքիաթներ» | Արևիկ | 15 | |
| 4 | * | «Հայ ժողովրդական հեքիաթներ» | Արևիկ | 14 | |
| 5 | * |
Շառլ Պերրո «Մոխրոտիկը» |
Բուկինիստ | 12 | |
| 6 | Նոր | «Խոսող այբուբենը» | ՋիԷսԷմ | 10 | |
| 7 | Նոր |
Հովհաննես Թումանյան «Շունն ու կատուն» |
ՋիԷսԷմ | 9 | |
| 8 | * |
Գրիմ Եղբայրներ «Հեքիաթներ» |
Արևիկ | 8 | |
| 9 | * | «Երեք խոզուկները» | ՋիԷսԷմ | 7 | |
| 10 | * | Լուիսա Մեյ Էլքոթ «Փոքրիկ տիկիններ» |
Զանգակ | 5 |