4 րոպեի ընթերցում
ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ: Հայ մեծանուն բանաստեղծ Համո Սահյանի 100-ամյա հոբելյանին ընդառաջ «ՀամոՍահյան գիտամշակութային կենտրոն» հասարակական կազմակերպությունը նախաձեռնել է նրա երկերի քառահատորյակի հրատարակությունը, որը պատրաստ կլինի մինչեւ 2014 թվականի ապրիլը:
«Արմենպրես»-ի թղթակցի հետ զրույցում հասարակական կազմակերպության նախագահ, բանասիրական գիտությունների դոկտոր Շչորս Դավթյանը նշեց, որ երկերի չորս հատորների հրատարակումն իրականացվում է ՀՀ մշակույթի նախարարության հետ համատեղ:
«Երկերի չորս հատորյակը կամփոփի բանաստեղծի բոլոր կարեւոր ժողովածուները: Դրանք ոչ միայն որակյալ տպագրությամբ են լույս տեսնում, այլեւ յուրաքանչյուր հատորում տեղ են գտնելու Սահյանի ձեռագրերը եւ մոտ 15-20 լուսանկար»,- պատմեց Դավթյանը:
Հասարակական կազմակերպությունը իր գործունեության 10 տարվա ընթացքում տպագրել է Սահյանի ստեղծագործությունների շուրջ 30 անուն գիրք, որոնք քանակապես ավելի շատ են, քան բանաստեղծի կենդանության օրոք տպագրվածները: Իր կենդանության օրոք բանաստեղծի ստեղծագործությունները վերջին անգամտպագրվել էին 1986 թվականին:
«Մենք հրատարակել ենք Սահյանին նվիրված հանրագիտարան, որը հազվադեպ է մեր իրականության մեջ: Հանրագիտարանում տեղ է գտել մոտ 300 բառահոդված`Սահյանի հարազատների, մտերիմների, նրա հետ առնչվող երեւույթների, իրադարձությունների վերաբերյալ, եւ ավելի քան 100 լուսանկար»,- պատմեց հանրագիտարանի կազմողը, ով ոչ միայն ավելի քան 25 տարի եղել է Սահյանի ընկերը, այլեւ թեկնածուական եւ դոկտորոկան թեզեր է պաշտպանել Սահյանի ստեղծագործական գործունեությանը վերաբերող թեմաներով:
Դավթյանի կարծիքով` 2012 թվականին տպագրված հանրագիտարանը հնարավորություն կտա սահյանասերներին գտնել բոլոր տվյալները մեծանուն բանաստեղծի մասին: Նրա գնահատմամբ` Սահյանը հայկական պոեզիայում ներդրեց առաջին հերթին մարդու եւ բնության փոխըմբռնման տեսությունը, եւ «բանական բնության եւ բնական մարդու» գաղափարը:
«Սահյանի կողմից կիրառված նորարարությունների թվում էր հոտի գեղարվեստական ըմբռնումը, ինչպես օրինակ հայի հոտ, մոր ծոցի հոտ, մորմոքի հոտ: Երրորդ առանձնահատկությունը Սահյանի հայրեններն են: Նա խիզախություն ունեցավ գրել հայրեններ, որոնք առանձնացան թեմատիկ առումով: Եվ ի տարբերություն Քուչակի`նրա հայրենները ընթերցողինտանում են դեպի փիլիսոփայական խորքեր»,- պարզաբանեց կազմակեպության նախագահը:
Կենտրոնի կողմից մեծ բանաստեղծի ծննդյան 100-ամյակին ընդառաջ իրականացվում են մի շարք այլ ծրագրեր: Նրանց արդեն հաջողվել է հանրության ուշադրությանը ներկայացնել բանաստեղծի հեղինակած երգերով ձայնասկավառակ, նրա արտասանությամբ DVD, ինչպես նաեւ նկարահանել 4-5 կարճամետրաժ ֆիլմեր:
Սահյանի ծննդավայր` Սյունիքի մարզի Սիսիանի տարածաշրջանի Լոր գյուղում գտնվող հայրական տանը Զարգացման գրասենյակի միջոցով իրականացվում են վերանորոգման աշխատանքներ, եւ նախատեսված է, որ առաջիկայում այն կվերածվի տուն-թանգարանի:Բացառված չէ նաեւ գրողի հուշարձանի բացումը Երեւանում:«Համո Սահյանգիտամշակութային կենտրոն»հասարակական կազմակերպության կողմից մասսայական տպաքանակով լույս ընծայած գրքերը չեն վաճառվում, այլ անվճար տրամադրվում են մայրաքաղաքային եւ մարզային գրադարաններին, Երեւանի եւ Գյումրու` Սահյանի անունը կրողդպրոցներին, գիտամշակութային կենտրոններին, Հայաստանի գրողների միությանը եւ գրողի հարազատներին: