360.54
Սյունիքում կստեղծվի Խուստուփ արգելոց
2 րոպեի ընթերցում
ԵՐԵՎԱՆ, 7 ՕԳՈՍՏՈՍԻ, ԱՐՄԵՆՊՐԵՍ: Սյունիքի մարզում առաջիկայում նախատեսվում է ստեղծել «Խուստուփ» արգելոց: Այն կտեղակայվի մարզի չորս համայնքներում` Գեղանուշում, Լեռնաձորում, Ճակատենում և Ծավում: Ինչպես «Արմենպրես»-ին տեղեկացրեց Հայաստանի պահպանվող տարածքների համակարգի զարգացման ծրագրի ղեկավար Կարեն Ճենտերեճյանը, արգելոցը կզբաղեցնի մոտ 7000 հեկտար տարածք: Հետագայում նախատեսված է արգելոցի տարածքում կառուցել զբոսաշրջային կառույց: Հուլիսին նախագիծն արդեն հանձնվել է Հայաստանի Հանրապետության բնապահպանության նախարարություն:
«Ծրագիրը հավանաբար կիրականացվի ամենաուշը հաջորդ տարի»,- ավելացրեց Կարեն Ճենտերեճյանը: Արգելոցի ստեղծման աշխատանքներին կմասնակցեն Բնության համաշխարհային հիմնադրամի հայաստանյան գրասենյակը և Հայաստանի բնապահպանության նախարարության Ծրագրերի իրականացման պետական հիմնարկը: Ինչպես մնացած բոլոր պետական արգելոցներինը, «Խուստուփի» սահմանները պաշտպանվելու են պետական մակարդակով:
ՀՀ բնապահպանությանը նախարարության տեղեկատվության և հասարակայնության հետ կապերի վարչության պետ Արմեն Վարդանյանն «Արմենպրես»-ին տեղեկացրեց, որ նախարարությունում արդեն քննարկել են նախագիծը և առաջիկայում վերջնական եզրակացություն կտրվի դրան եւ կներկայացվի ՀՀ կառավարություն:
Բաժանորդագրվեք մեր ալիքին Telegram-ում