Doing Business: Կին գործարարը հիմք է դրել Հայաստանում յուրահատուկ մի նախաձեռնության` օրգանական ծնեբեկի արտադրությանը
4 րոպեի ընթերցում
Փոքր եւ միջին ձեռնարկատերերի մասին«Արմենպրես»-ի ակնարկների շարքի հերոսը օրգանական ծնեբեկի արտադրությամբ զբաղվող Մարսելա Խուրշուդյանն է, ով սկսնակներին խորհուրդ է տալիս սեփական բիզնեսը սկսել փոքր ծավալներից, այնուհետև ընդլայնել և զարգացնել գործը:
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Ծնեբեկի արտադրության համար խոշոր ֆինանսական ներդրում անհրաժեշտ չէ: Անհրաժեշտ է ունենալ համբերություն` ցանելուց մինչև առաջին բերքահավաքը սպասելու համար: Այդ դժվար ուղին է որոշել ընտրել Հայաստանում յուրահատուկ մի նախաձեռնության` օրգանական ծնեբեկի արտադրության գաղափարի հեղինակ Մարսելա Խուրշուդյանը: Այդ ծանր գործում նա միայնակ չէ. օգնում են ամուսինը, որդիները և դուստրը: «Մտածեցի, թե ինչ բույս աճեցնեմ, որ նորություն լինի Հայաստանում, լինի օրգանիկ, տարածված չլինի և ծավալներն աճեն: Ու որոշեցի սկսել ծնեբեկի աճեցումը: Սկսել եմ սերմերից, ստացել եմ սածիլներ, տեղափոխել եմ բաց դաշտ»,- հիշում է 48-ամյա կին գործարարը:
Մարսելա Խուրշուդյանը իր գաղափարի իրագործման համար 2013թ. ապրիլի 5-ին ստացել է հատուկ մրցանակ` ՀՀ վարչապետի «Լավագույն կին գործարար 2013» մրցանակաբաշխության ընթացքում արժանանալով Ձեռնարկությունների զարգացման և շուկայի մրցունակության (EDMC) ծրագրի հատուկ մրցանակին: Խուրշուդյանը գաղափարի իրագործումը սկսել է 2007թ.: Մինչև 2010թ. համբերատար սպասել է, քանի որ սածիլները 3 տարի բերք չեն տալիս: Առաջին բերքից հետո նույն սածիլներն ընդունակ են բերք տալ մինչև 15 տարի շարունակ:
Հավաքելուց հետո բերքն իրացնում են թարմ տեսքով: Ծնեբեկը հիմնականում օգտագործվում է խոհարարության մեջ, դրանից պատրաստում են հատուկ ճաշատեսակներ: Կին գործարարի համար առաջացող բարդությունները կապված են միայն բույսի աճեցման հետ: «Եթե ոռոգման ջրի խնդիր լինի, դա էլ բարդություն կլինի»,- շարունակում է Մարսելա Խուրշուդյանը: Նա ցանկանում է ծնեբեկն աճեցնել նաև ջերմոցում, որպեսզի արտադրանքը կախված չլինի սեզոնից: Դրանից բացի նախատեսում է ավելացնել ցանքատարածքը և լրացուցիչ աշխատուժ ներգրավել` նպաստելով տեղական գործազրկության կրճատմանը:
Մասնագիտությամբ տնտեսագետ Մարսելա Խուրշուդյանը, չնայած աշխատել է բուն մասնագիտությամբ, սակայն ճգնաժամի տարիներին կորցրել է աշխատանքը, և երկար ժամանակ գործազուրկ լինելու ընթացքում էլ առաջացել է ծնեբեկի աճեցման գաղափարը: Դաշտերը Կոտայքի մարզի Ակունք գյուղում են: Գործարարը կարծում է, որ սեփական բիզնեսը սկսելու համար Հայաստանում կան բավարար պայմաններ: Իսկ դժվարություններ կան բոլոր երկրներում` անկախ տարածաշրջանից: «Խնդրեմ, ասացեք մի վայր, որտեղ որևէ դժվարություն չկա: Այստեղ կան բոլոր անհրաժեշտ պայմանները, պարզապես պետք է ցանկանալ, որպեսզի սկսել բիզնեսը»,- վստահեցնում է գյուղատնտես-գործարարը: Նրանց, ովքեր ցանկանում են հիմնել սեփական գործը, սակայն ունեն մտավախություն, Խուրշուդյանը խորհուրդ տվեց սկսել փոքր ծավալներից, այնուհետև ընդլայնել և զարգացնել գործը:
Մարսելա Խուրշուդյանը մասնակցել է Հայաստանի ՓՄՁ զարգացման ազգային կենտրոնի գործարար դասընթացներին, որոնց ընթացքում սովորել է կազմել ճիշտ գործարար նախագիծ, որն էլ արժանացել է հանձնաժողովի բարձր գնահատականին: Դրանից հետո Խուրշուդյանը կարողացել է իրագործել գաղափարը` ստացած վարկի միջոցով:
Հաջողության պատմությունը եւ լուսանկարները տրամադրել է Փոքր եւ միջին ձեռնարկատիրության զարգացման ազգային կենտրոնը
Հեղինակ՝ Դավիթ Մուրադյան