Doing Business: Հայաստանի ամենաառաջին նորաձևության կենտրոններից մեկը շարունակում է զարգանալ
7 րոպեի ընթերցում
Փոքր եւ միջին ձեռնարկատերերի մասին«Արմենպրես»-ի ակնարկների շարքի հերոսը ՀՀ վարչապետի «Լավագույն կին գործարար» մրցանակաբաշխության «Կին արտադրողի լավագույն ապրանքանիշ» մրցանակին արժանացած,նկարիչ-մոդելավորող Կարինե Դնոյանն է, ով երիտասարդներին եւ սկսնակներին խորհուրդ է տալիս չվախենալ գաղափարներից և փորձել իրագործել դրանք:
ԵՐԵՎԱՆ, 6 ՀՈՒՆԻՍԻ, ԱՐՄԵՆՊՐԵՍ: «Ատեքս» նորաձևության կենտրոնը Հայաստանում գործում է արդեն 22 տարի: Չնայած Կարինե Դնոյանն այնտեղ աշխատել է հիմնադրման օրից, կենտրոնի ղեկավարն է դարձել 11 տարի առաջ: «Ինձ Մոսկվայում սովորելուց հետո երեք տարով գործուղման ուղարկեցին Հայաստան, այն ժամանակ այդպես էր, որպեսզի ես աշխատեմ այստեղի կարի ֆաբրիկաներից մեկում: Բայց այդ երեք տարին ձգվում է մինչև հիմա»,- ժպտալով հիշում է փորձառու դիզայներ-մոդելավորողը: Կարինե Դնոյանը 2013 թ. ապրիլին պարգևատրվել է ՀՀ վարչապետի «Լավագույն կին գործարար» մրցանակաբաշխության «Կին արտադրողի լավագույն ապրանքանիշ» մրցանակով: Նա մրցանակը ստանալիս ընդգծել է, որ զգացված է 20 տարուց ավելի աշխատելուց հետո պետության ղեկավարների կողմից նման գնահատականին արժանանալու համար:
Նա իր գործունեությունը Հայաստանում սկսել է այն ժամանակ, երբ երկիրն ուներ հզոր թեթև արդյունաբերություն և աշխատող մեծ գործարաններ: Սակայն ցավոք, դա երկար չի տևել: Պարադոքսն այն է, ասում է Դնոյանը, որ ֆաբրիկաները և արտադրությունը չափազանց շատ էին, սակայն, որպես այդպիսին, հագուստի մոդելավորող մասնագիտությունը Հայաստանում չկար: «Իսկ երբ 1991թ. ստեղծվեց Ատեքս նորաձևության կենտրոնը, որպեսզի արտադրող ընկերությունների համար տրամադրի հագուստի մոդելներ, այդ ամենն անհետացավ»,- հիշում է Կարինե Դնոյանը:
Ընկերության հիմնադիրը եղել է այն ժամանակվա Թեթև արդյունաբերության նախարարությունը: Անունն ինքնին ունեցել է խորհրդանշական նշանակություն. ԱՏԵՔՍԸ հապավում է անգլերեն Armenian Textile բառակապակցությունից, ինչը նշանակում է «հայկական գործվածք»: Մի քանի տարի որպես պետական հիմնարկ գործելուց հետո, ընկերության ղեկավարությունը որոշել է վերափոխել կառույցի կազմակերպչական ձևը և հիմնադրել է «Ատեքս Նորաձևության կենտրոն» փակ բաժնետիրական ընկերությունը:
«Ինչու՞ կենտրոն. որովհետև մենք զբաղվում ենք ամեն ինչով, ինչն առնչվում է նորաձևությանը»,- պարզաբանում է կենտրոնի գործադիր տնօրենը: Կարինե Դնոյանը հպարտությամբ նշում է, որ կենտրոնի նորարար ուսուցողական ծրագրերն արդեն ապացուցել են իրենց արդյունավետությունը. կենտրոնի նախկին սաներից շատերն արտերկրում մեծ ձեռքբերումներ ու հաջողություններ ունեն: Ասում է` հագուստի մոդելավորման և դրա ուսուցման հետ կապված ծրագրերն առաջինը Հայաստանում սկսել է իրականացնել իրենց կենտրոնը:
Հագուստի մոդելները ցուցադրելու համար անհրաժեշտ են դրանք կրող մոդելներ: Այդ հարցը նույնպես կենտրոնը հոգացել է սեփական ուժերով: Մյուս ուղղությունը, որտեղ նույնպես «Ատեքսն» առաջինն է սկսել ուսուցողական ծրագրեր, մոդելների և ֆոտոմոդելների ուսուցումն է: «Սկզբում մենք հենց փողոցից էինք գտնում և հրավիրում գեղեցիկ տղաներին և աղջիկներին, հետո որոշեցինք հիմնել դպրոց»,- նշում է Դնոյանը:
Նոր ուղղություններից է մանկական դպրոցի հիմնադրումը: Կարինե Դնոյանը համոզված է` գեղագիտական ճաշակը պետք է մարդու մեջ ձևավորվի մանկուց: Այդ նպատակով էլ հիմնադրվել է մոդելավորողների և մոդելների մանկական դպրոցը: Դպրոցը Ռուսաստանում կազմակերպված մի քանի մրցույթների ժամանակ շահել է առաջին տեղը: Իսկ շրջանավարտներից մեկն այսօր աշխատում է Ջորջիո Արմանիի ստուդիայում:
«Ատեքսը» Հայաստանում ներկայացնում է մի քանի միջազգային մրցույթներ: Դրանցից Կարինե Դնոյանը հատկապես առանձնացրեց «Ռուսական ուրվանկար» ( «Русский силуэт») մրցույթը: Այն Հայաստանում կազմակերպել է արդեն իններորդ անգամ:
Յուրաքանչյուր գործի պես, «Ատեքսը» ևս ունի բարդություններ: Դրանք առաջանում են, երբ հարկային մարմիններին փորձում են բացատրել, որ իրենց գործունեությունը և մատուցած ծառայությունները թույլ չեն տալիս, որպեսզի իրականացվի գործունեության պլանավորում: Մյուս բարդությունն ըստ Դնոյանի անընդհատ տեղափոխություններն են: «Որպես պետական հիմնարկ` մենք ունեինք մեր սեփական տարածքը: Սակայն սեփականաշնորհվելուց հետո տարածքի խնդիրը դարձավ սուր և գրեթե անլուծելի: Երկար տարիներ մենք տարածք էինք վարձակալում Մերգելյան Ինստիտուտի շենքում: Սակայն այսօր ռուսաստանցի սեփականատերերը մեզ դուրս հրավիրեցին` ասելով, որ գաղտնի ծրագրեր իրականացնող կառույցում չի կարող նորաձևության կենտրոն գործել»,- ցավով նշում է Ատեքս նորաձևության կենտրոնի տնօրենը:
Մյուս բարդությունը ֆինանսավորման աղբյուրների բացակայությունն է: Մի քանի անգամ կենտրոնին առաջարկել են հովանավորություն, սակայն Դնոյանն ասում է, թե չի ցանկացել կորցնել ֆինանսական անկախությունը և ընտրել է բարդ ուղին: «Դրա համար էլ այսօր ես ասում եմ, որ այն դիզայներները, որոնք մեր երկրում քիչ թե շատ կայացել են, արժանի են ամենաբարձր հարգանքին»,- կարծիքն է հայտնում նորաձևության ոլորտի փորձառու մասնագետը:
Երիտասարդներին և հատկապես կանանց Կարինե Դնոյանը հորդորում է չվախենալ գաղափարներից և փորձել իրագործել դրանք: «Եթե նույնիսկ ձախողվեն, դա էլ յուրօրինակ դաս կլինի հետագայի համար: Չէ՞ որ ռիսկը վեհ բան է»,- իր միտքն է ավարտում գործարար, նկարիչ-մոդելավորող Կարինե Դնոյանը:
Հաջողության պատմությունը եւ լուսանկարները տրամադրել է Փոքր եւ միջին ձեռնարկատիրության զարգացման ազգային կենտրոնը
Հեղինակ՝ Դավիթ Մուրադյան