Վրաստանի վարչապետի այցից դրական արդյունքներ են ակնկալվում. վրացագետ

ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Վրաստանի վարչապետ Բիձինա Իվանիշվիլիի այցը կկրի ճանաչողական բնույթ: Քննարկվելիք հարցերը կընդգրկեն տնտեսական, քաղաքական, մշակութային և այլ ոլորտներ: Այդ մասին «Արմենպրես»-ի հետ զրույցում նշեց վրացագետ Ալիկ Էրոյանցը: «Այցի ընթացքում կլինեն ծանոթություններ բարձրաստիճան պաշտոնյաների հետ: Ընդհանուր առմամբ` Իվանիշվիլին հնարավորություն կունենա ավելի շոշափելիորեն ծանոթանալ հայ-վրացական հարաբերությունների ներկա իրավիճակին՝ իր համար հստակեցնելով հետագա դիրքորոշումն ու անելիքները»,- ասաց վրացագետը:

Էրոյանցը Վրաստանի վարչապետի այցից դրական սպասելիքներ ունի վիրահայության խնդիրների լուծման առումով: Վրացագետը նշեց, որ նախընտրական քարոզչության ընթացքում «Վրացական երազանք» դաշինքի կողմից բավականին մանրամասն անդրադարձ կատարվել է ազգային փոքրամասնությունների՝ այդ թվում հայության խնդիրներին: «Նրանք, օրինակ, խոսք են տվել Ջավախքում ավելացնել հայոց լեզվի դասաժամերը»,- հիշեցրեց նա` հավելելով, որ խոսք է գնացել նաև հայ-վրացական համալսարան հիմնելու մասին: Էրոյանցի դիտարկմամբ՝ դրական միտումը կայանում է նրանում, որ նախորդ իշխանությունները նման խոստումներ չէին տալիս` ընդհակառակը կրճատում էին դասաժամերը և մարդու իրավունքների տարրական խախտումներ թույլ տալիս:

Ալիկ Էրոյանցի դիտարկմամբ՝ Վրաստանի նոր իշխանությունները «մեսիջներ» են ուղարկել Ադրբեջանին` հասկացնելով այդ երկրից ունեցած էներգետիկ կախվածության վիճակը շարունակելու անցանկալիությունը: «Ռուսաստանը որպես այլընտրանք դիտարկելով՝ Վրաստանը ադրբեջանական էներգետիկ կախվածությունից զերծ մնալու հույսեր ունի»,- նշեց վրացագետը:

Անդրադառնալով Ռուսաստանի և Վրաստանի հարաբերությունների կարգավորման գործընթացում Հայաստանի դերակատարությանը՝ վրացագետը շահավետ բնութագրեց այն: «Քննարկվելիք տարածաշրջանային հարցերից կլինի ռուս-վրացական հարաբերությունների բարելավումը, որտեղ մեր իշխանությունները ինչ-որ ակնարկներ կանեն, թե ինչով կարող են օգտակար լինել այդ հարցում»,- ասաց Էրոյանցը՝ հավելելով, որ Հայաստանի միջնորդության տարբերակը ձեռնտու է և Վրաստանին, և Ռուսաստանին: Վրացագետի խոսքով՝ կքննարկվեն նաև տնտեսական և սահմանային հարցեր, ինչպես նաև՝ հայկական եկեղեցիների հարցը: Էրոյանցի դիտարկմամբ՝ ի տարբերություն որոշ հարցերում ծայրահեղական դիրքորոշումներ ունեցող նախորդ իշխանությունների՝ ներկա իշխանությունների հետ հնարավոր կլինի փոխզիջումային տարբերակներ գտնել փոխադրումների, դրանց գների և այլ հարցերի հետ կապված:

Վրաստանի վարչապետ Բիձինա Իվանիշվիլիի գլխավորած պատվիրակությունը հունվարի 17-ին կժամանի Հայաստան: Երևանում նախատեսված են Վրաստանի վարչապետի հանդիպումները ՀՀ նախագահ Սերժ Սարգսյանի, վարչապետ Տիգրան Սարգսյանի, Ն.Ս.Օ.Տ.Տ. Գարեգին Բ Ամենայն Հայոց կաթողիկոսի, ինչպես նաև ՀՀ արտաքին գործերի, Էներգետիկայի և բնական պաշարների և Էկոնոմիկայի նախարարների հետ: Բիձինա Իվանիշվիլին կայցելի Ծիծեռնակաբերդ՝ հարգանքի տուրք մատուցելու Հայոց ցեղասպանության զոհերի հիշատակին, կլինի նաև Մատենադարանում:

Հայաստանի Հանրապետության և Վրաստանի միջև դիվանագիտական հարաբերությունները հաստատվել են 1992 թվականի հուլիսի 17-ին: Երկու երկրների միջև գործում են փոխհարաբերությունների գրեթե բոլոր ոլորտներն ընդգրկող շուրջ 80 միջազգային պայմանագրեր, համաձայնագրեր, հուշագրեր և արձանագրություններ: 1993 թվականից ի վեր Հայաստանի և Վրաստանի միջև կատարվել է 66 փոխայցելություն՝ արտաքին գործերի նախարարների, վարչապետների և նախագահների մակարդակներով: