Ռուսաստանը կշարունակի նպաստել Լեռնային Ղարաբաղի հակամարտության խաղաղ կարգավորմանը. Սերգեյ Լավրով
1 րոպեի ընթերցում
ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: Ռուսաստանը ԵԱՀԿ Մինսկի համանախագահ երկրների հետ կշարունակի աշխատանքը Լեռնային Ղարաբաղի հակամարտության խաղաղ և երկարաժամկետ լուծումը գտնելու ուղղությամբ: Ինչպես հաղորդում է «Արմենպրես»-ը` վկայակոչելով ՌԴ արտաքին գործերի նախարարության պաշտոնական կայքը, այս մասին հայտարարել է ՌԴ ԱԳ նախարար Սերգեյ Լավրովը` Դուբլինում ընթացող ԵԱՀԿ նախարարական խորհրդաժողովում:
«ԵԱՀԿ Մինսկի խմբի մյուս համանախագահ երկրների` ԱՄՆ-ի և Ֆրանսիայի հետ մենք կշարունակենք նպաստել ղարաբաղյան հակամարտության կողմերի դիրքորոշումների մերձեցմանը»,- ասել է Լավրովը: Ռուսաստանը, Լավրովի խոսքով, հակամարտության կարգավորումը տեսնում է միայն հակամարտող կողմերի խաղաղ բանակցությունների միջոցով:
Չկարգավորված հակամարտությունները Լավրովն անվանել է ԵԱՀԿ տարածաշրջանում անվտանգության սպառնալիք: