2 րոպեի ընթերցում
ԵՐԵՎԱՆ, 31 ՀՈՒՆՎԱՐԻ, ԱՐՄԵՆՊՐԵՍ: Շիրակի մարզի Գյումրու քաղաքապետ Վարդան Ղուկասյանը ՀԳՄ նախագահ Լեւոն Անանյանին տվել է պարտավորագիր: Դրա համաձայն` Ղուկասյանների ընտանիքը պատրաստ է Թբիլիսում գտնվող Հովհ. Թումանյանի տունը գնելու նպատակով տրամադրել անհրաժեշտ գումարը: Ինչպես հաղորդում է «Արմենպրես»-ը, այդ մասին այսօր լրագրողների հետ հանդիպման ժամանակ նշել է ՀԳՄ նախագահ Լեւոն Անանյանը: Նրա խոսքով` Գյումրիի քաղաքապետը եւ նրա եղբայրը իրենց խնայողություններով որոշել են գնել բնակարանը եւ նվիրել Թբիլիսիի հայկական համայնքին: «Թումանյանը միավորեց բոլորիս եւ ես շատ ուրախ եմ դրա համար»,- ասաց Լեւոն Անանյանը:
Բնակարանը ձեռք բերվելուց հետո այն կդառնա մշակութային կենտրոն, որի շահագործման ծախսերը կվերցնի իր վրա «Լոռվա ձոր» հայրենակցական միությունը: Միության նախագահ Սերգո Երիցյանը հավաստիացրեց, որ իրենք անպայման կօգնեն, կօժանդակեն, որ կենտրոնում միշտ թեւածի հայկական ոգին եւ շունչը:
Հայ մեծ բանաստեղծի թոռնուհի Իռմա Սաֆրաստբեկյանն ուրախությամբ արձանագրեց, որ այսուհետ հարցով կզբաղվի ոչ թե իր ընտանիքը, այլ` Գրողների միությունը: «Այսուհետ այս ծանր բեռը մեզ վրա չէ»,- ասաց նա` հավաստիացնելով, որ ինքը որեւէ լրատվամիջոցի դեռեւս չէր տվել այն բարերարի անունը, որ պետք է գներ բնակարանը:
Դեռեւս միայն լուծում չի ստացել Թումանյանի ծոռնուհու` Ալյոնա Կոլեսնիկովայի հարկաբաժնի հարցը, որի լուծման ուղղությամբ եւս կտարվեն աշխատանքներ: