2 րոպեի ընթերցում
ԵՐԵՎԱՆ, 9 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ գյուղատնտեսության նախարար Սերգո Կարապետյանի եւ «Ագրոբիզնեսի եւ գյուղի զարգացման կենտրոն» հիմնադրամի տնօրեն Գագիկ Սարդարյանի միջեւ «Հայաստանի եւ Վրաստանի սահմանամերձ շրջաններում գյուղատնտեսական կենդանիների առողջության կառավարում» ծրագրի շրջանակներում դեկտեմբերի 9-ին ստորագրվել է փոխըմբռնման հուշագիր:
Ինչպես «Արմենպրես»-ին տեղեկացրին Գյուղատնտեսության նախարարության մամուլի ծառայությունից, վերոնշյալ ծրագիրն իրականացվում է Ավստրիայի Զարգացման եւ Համագործակցության գործակալության ֆինանսավորմամբ:
2005 թվականից «Ագրոբիզնեսի եւ գյուղի զարգացման կենտրոն» հիմնադրամը (CARD) լուրջ գործունեություն է ծավալել գյուղատնտեսության ոլորտում' հատկապես անասնապահության ճյուղում: Այս համագործակցությամբ լուրջ աշխատանք կտարվի պետություն – մասնավոր հատված կապի ամրապնդման առումով:
«Ծրագրի իրականացման ընթացքում սերտ համագործակցություն կձեւավորվի երկու բարեկամ երկրների' Հայաստանի եւ Վրաստանի գյուղատնտեսության նախարարությունների միջեւ»,- նշել է Կարապետյանը:
Ծրագրի նպատակն է անասնաբուժական ծառայությունների կարողությունների ուժեղացման միջոցով աջակցել Հայաստանի հյուսիսային (Շիրակի, Լոռու մարզեր) եւ Վրաստանի հարավային (Սամցխե - Ջավախեթի, Քվեմո – Քարթլի շրջաններ) շրջանների գյուղացիական տնտեսություններին կենդանիների առողջության բարելավման, կենդանիների հիվանդությունների կանխարգելման եւ պահվածքի արդյունավետության բարձրացման գործում:
Հրավիրված եւ տեղի բարձրակարգ մասնագետների միջոցով կվերապատրաստվեն շուրջ 60 անասնաբույժներ, որոնք իրենց հերթին խորհրդատվական եւ անանաբուժական ծառայություններ կմատուցեն գյուղացիական տնտեսություներին:
Ծրագրի իրականացման ընթացքում կկազմակերպվեն Հայաստանի եւ Վրաստանի անասնաբույժների համատեղ խորհրդակցություններ եւ դասընթացներ, ինչպես նաեւ երկու երկրների պետական, հասարակական եւ մասնավոր հատվածների մասնակցությամբ կոնֆերանսներ' բնագավառի խնդիրների քննարկման եւ լուծումների առաջարկման նպատակով: