ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: Ծնունդների ընդհանուր թվի միջին ցուցանիշի առումով Հայաստանի համար աղջիկ/տղա 100/112 հարաբերակցությունը Եվրախորհրդի փորձագետի տեսանկյունից գնահատված է որպես արդիական խնդիր' սելեկտիվ աբորտների առումով: Ինչպես «Արմենպրես»-ին տեղեկացրին Առողջապահության նախարարությունից, պաշտոնական վիճակագրության համաձայն' 1990-2001 թվականների ընթացքում ծնելիության ցուցանիշը կրճատվել է ավելի քան 2 անգամ, իսկ 2001թ-ից սկսած' այն սկսել է դրսեւորել աճի միտում' 2010թ-ին հասնելով 13.8 ցուցանիշի:
Ինչ վերաբերում է նորածնի սեռի կանխորոշման հարցին եւ դրանով պայմանավորված սելեկտիվ աբորտներին, ապա առողջապահական համակարգում այդ խնդիրն արտացոլող վիճակագրություն չկա, հետեւաբար' բուժհաստատությունների կողմից նախարարություն ներկայացվող հաշվետվությունները, նորածնի սեռի կանխորոշման վերաբերյալ, տեղեկատվություն չեն պարունակում: Որպես խնդիրն արտացոլող անուղղակի ցուցանիշներ' օգտագործվում են ըստ սեռի եւ ծննդյան կարգի գրանցվող ծնունդների թիվն ու դրանց հարաբերակցությունը' աղջիկ/տղա կտրվածքով:
Հիմնվելով ըստ սեռի ծնունդների վերաբերյալ տվյալների վրա' կարելի է անուղղակի ենթադրություն անել սելեկտիվ աբորտների առկա գործելակերպի մասին, որին նպաստող գործոններից է պտղի սեռի որոշման հնարավորությունը հղիության ընթացքում:
Սակայն, խնդիրը, նախարարության հավաստմամբ, շատ ավելի խորքային է ու բազմագործոն, ու վերջնական եզրակացության հնարավոր է հանգել միայն լուրջ ժողովրդագրական հետազոտության եւ վերլուծության արդյունքում: Այս նպատակով ընթացքի մեջ է ՄԱԿ-ի բնակչության հիմնադրամի, ՀՀ Ազգային վիճակագրական ծառայության եւ ՀՀ ԱՆ համագործակցությամբ իրականացվող հետազոտությունը' ուղղված սեռով պայմանավորված հղիության ընդհատումների տարածվածության գնահատմանն ու դրա պատճառների պարզաբանմանը: Այն իրականացվում է վերարտադրողական տարիքի կանանց հարցման ճանապարհով, ինչպես տնային տնտեսությունների, այնպես էլ բուժհաստատությունների մակարդակով: Հետազոտության տվյալների արդյունքների ամփոփումը ակնկալվում է տարեվերջին