1 րոպեի ընթերցում
ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 21-24-ը Չեխիայի Հանրապետության մայրաքաղաք Պրահայում տեղի է ունեցել Եկեղեցիների Եվրոպական խորհրդի Կենտրոնական կոմիտեի ժողով:
Ինչպես «Արմենպրես»-ին հաղորդեցին Մայր Աթոռի տեղեկատվական համակարգից, ժողովին քննարկվել են ԵԵԽ-ի ապագա գլխավոր քարտուղարի ընտրությանը եւ 2013-ին Բուդապեշտում կայանալիք ԵԵԽ համաժողովի կազմակերպմանն առնչվող հարցեր, ինչպես նաեւ խորհրդի անդամ Եկեղեցիների ներկայացուցիչներին ներկայացվել է ԵԵԽ-ի տարեկան ֆինանսական հաշվետվությունը:
ԵԵԽ կենտրոնական կոմիտեի անդամները նաեւ հադիպում են ունեցել Չեխիայի Հանրապետությունում գործող կրոնական կազմակերպությունների ներկայացուցիչների հետ, որի ընթացքում քննարկվել են Եվրոպական երկրներում քրիստոնեական եկեղեցիների առջեւ ծառացած մարտահրավերները դիմագրավելու ուղղությամբ համատեղ առաքելություն իրականացնելու վերաբերյալ մի շարք խնդիրներ:
ԵԵԽ Կենտրոնական կոմիտեի ժողովին Ն.Ս.Օ.Տ.Տ. Գարեգին Բ Ծայրագույն պատրիարք եւ Ամենայն հայոց կաթողիկոսի օրհնությամբ Հայաստանյայց առաքելական Սուրբ եկեղեցին ներկայացրել է Մայր Աթոռ Սուրբ Էջմիածնի միաբան Տ. Գարեգին աբեղա Համբարձումյանը: